Fer ekki með Knicks til London af ótta við að vera myrtur

Tyrkneski miðherjinn Enes Kanter mun ekki fara með liðsfélögum sínum í New York Knicks til London þar sem liðið mun leika NBA leik gegn Washington Wizards í O2-höllinni þann 17.janúar næstkomandi.

Ástæðan er sú að hann óttast tyrkneska njósnara í Evrópu og Kanter hefur svo sannarlega ástæðu til að óttast.

Hann hefur ekki farið leynt með skoðanir sínar á tyrkneska forsetanum Recep Tayyip Erdogan og hefur komist í hann krappann á ferðalögum til Evrópu vegna þessa.

Árið 2017 var honum haldið á flugvelli í Rúmeníu þar sem stjórnvöld í Tyrklandi fyrirskipuðu að vegabréf hans yrði gert ógilt. Honum tókst þó að komast til Bandaríkjanna að lokum en í kjölfarið af ógildingu vegabréfsins var gefin út handtökuskipun á Kanter. Hann hefur því ekki mikinn áhuga á að ferðast til Evrópu.

„Það er möguleiki á að ég verði myrtur þarna svo ég ætla bara að halda kyrru fyrir hér. Ég vil að sjálfsögðu hjálpa liði mínu en þetta kemur í veg fyrir að ég geti unnið mína vinnu. Það er sorglegt,“ segir Kanter.

Knicks hafði áður gefið út að Kanter myndi ekki ferðast með liðinu í leikinn vegna vandamála með vegabréfaáritun.

Knicks center Enes Kanter said he wouldn't travel with the team to London because he feared he could be killed for his public opposition to Turkish President Recep Tayyip Erdogan https://t.co/3U30ZRPUUM

— The New York Times (@nytimes) January 5, 2019