Djákninn við Bergstaðastræti selur fúnkísslotið

Inga Bryndís Jónsdóttir, djákni, og eiginmaður hennar Birgir Arnarson hafa sett einstaklega fallegt einbýlishús sitt við Bergstaðastræti á sölu.

Inga bauð áhorfendur Stöðvar 2 í heimsókn heim  til sín árið 2017 þegar Sindri Sindrason skellti sér til hennar.

Inga hefur búið í virkilega fallegu og rómantísku einbýlishúsi á Bergstaðastrætinu ásamt eiginmanni, tveimur börnum og einum tengdasyni. Húsið var byggt upp í kringum 1930 í svokölluðum fúnkís stíl en hjónin eyddu tveimur árum í að gera það upp alveg frá a-ö.

Inga rekur verslunina Magnolia-Design við Skólavörðustíg sem sérhæfir sig í Skandínavískri hönnun og fegurð. Hún á búðina ásamt vinkonu sinni Kristínu.

Um er að ræða 290 fermetra einbýlishús í 101 Reykjavík. Alls eru 6 svefnherbergi og fimm baðherbergi í húsinu sem er á þremur hæðum. 

Í kjallara hússins er aukaíbúð með tveimur svefnherbergjum, fataherbergi, stofu, eldhúskrók og tveimur baðherbergjum.

Húsið er allt nýlega endurnýjað á mjög vandaðan og smekklegan máta, bæði að innan sem utan.

Húsið var byggt árið 1933 en fasteignamat eignarinnar er 138,5 milljónir.

Hér að neðan má sjá myndir af Bergstaðastræti 86.