Sport

Kraftaverkið í Miami stal senunni í NFL-deildinni í gær

Óskar Ófeigur Jónsson skrifar
Kenyan Drake var hetja Miami Dolphins á lokasekúndunum.
Kenyan Drake var hetja Miami Dolphins á lokasekúndunum. Vísir/Getty
Ótrúleg endasókn Miami Dolphins kom í veg fyrir að New England Patriots tryggði sér sigur í Austurriðli Ameríkudeildarinnar tíunda árið í röð. Kansas City Chiefs og New Orleans Saints tryggðu sér aftur á móti öruggt sæti í úrslitakeppninni þrátt fyrir að þrjár umferðir eru eftir.

Auk Kansas City og New Orleans er Los Angeles Rams líka komið í úrslitakeppnina en Hrútarnir fóru engu að síður tómhentir heim úr kuldanum í Chicago í nótt. Bæði Chicago Bears og Dallas Cowboys eru í góðum málum eftir góða sigra í gær en spennan jókst hinsvegar í riðlum Pittsburgh Steelers og Houston Texans sem töpuðu bæði.

Los Angeles Chargers liðið steig stórt skref í átt að úrslitakeppninni með sigri á Cincinnati Bengals en útliðið er ekki bjart hjá Denver Broncos, Carolina Panthers og Philadelphia Eagles sem töpuðu öll.

Sókn helgarinnar var án efa sóknin sem tryggði Miami Dolphins ótrúlega dramatískan 34-33 sigur á New England Patriots. Sóknin var fljót að fá nafnið „Kraftaverkið í Miami“ eða „Miracle in Miami“ og með réttu.

Möguleikar Miami-liðsins voru úti að mati flestra og svo svart var útlitið að lýsandi leiksins var löngu búinn að afskrifa liðið í miðri lokasókninni. Miami átti 69 jarda eftir í markið þegar aðeins sextán sekúndur voru eftir.

Leikmönnum Miami Dolphins tókst að halda síðustu sókninni lifandi með tveimur löglegum hliðarsendingum áður en Kenyan Drake hljóp 52 og í markið. Þetta er lengsta hlaupið í sögu NFL sem vinnur leik um leið og tíminn rennur út. Það má sjá þessa lokasókn hér fyrir neðan.





New England Patriots er enn með tveggja sigra forskot á Miami Dolphins í Austurriðli Ameríkudeildarinnar en Tom Brady og félagar hefðu unnið riðilinn með sigri.

Önnur frekar óvænt úrslit voru í Chicago þar sem heimamenn í Chicago Bears héldu stórskotaliði Los Angeles Rams í aðeins sex stigum og urðu aðeins annað liðið til að vinna Rams liðið á tímabilinu.





Kansas City Chiefs og New Orleans Saints unnu bæði sína leiki og hafa því unnið 11 leiki og aðeins tapað tveimur leikjum eins og lið Los Angeles Rams.

Kansas City Chiefs vann 27-24 heimasigur á Baltimore Ravens í framlengdum leik þar sem hinn ótrúlegi tengdasonur Mosfellsbæjar, Patrick Mahomes reddaði enn á ný sínu liði í lokin.

New Orleans Saints lenti undir í byrjun á móti Tampa Bay Buccaneers og var ellefu stigum undir í hálfleik. Drew Brees og félagar komu sterkir inn í seinni hálfleikinn og tryggðu sér efsta sætið í Suðurriðli Þjóðardeildarinnar með 28-14 sigri.

Dallas Cowboys steig stórt skref í átt að úrslitakeppninni með fimmta sigrinum í röð en liðið vann toppbaráttuslag í Austurriðli Þjóðardeildarinnar á móti ríkjandi meisturum í Philadelphia Eagles.

Það hefur flest gengið upp hjá Kúrekunum eftir að þeir fengu Amari Cooper frá Oakland Raiders. Amari Cooper skoraði þrjú snertimörk í gær þar á meðal sigursnertimarkið í framlengingunni. Dallas tryggir sér sigur í Austurriðlinum með sigri á Indianapolis næsta sunnudag.





Indianapolis Colts endaði níu leikjasigurgöngu Houston Texans með 24-21 sigri í Houston og hélt spennunni í Suðurriðli Ameríkudeildarinnar. Texans liðið er samt með tveggja sigurleikja forskot á Colts þegar þrír leikir eru eftir.

Öll úrslitin í NFL-deildinni í nótt:

Chicago Bears - Los Angeles Rams 15-6    

Buffalo Bills - New York Jets 23-27

Cleveland Browns - Carolina Panthers 26-20

Green Bay Packers - Atlanta Falcons 34-20

Houston Texans - Indianapolis Colts 21-24    

Kansas City Chiefs - Baltimore Ravens 27-24 (24-24, framlengt)

Miami Dolphins - New England Patriots 34-33

Tampa Bay Buccaneers - New Orleans Saints 14-28    

Washington Redskins - New York Giants 16-40    

Los Angeles Chargers - Cincinnati Bengals 26-21    

San Francisco 49ers - Denver Broncos 20-14

Arizona Cardinals - Detroit Lions 3-17    

Dallas Cowboys - Philadelphia Eagles 29-23 (23-23, framlengt)

Oakland Raiders - Pittsburgh Steelers 24-21

NFL

Mest lesið


Fleiri fréttir

Sjá meira


×

Mest lesið