Svöruðu tapi í fyrstu tveimur leikjunum með lengstu sigurgöngunni í sex ár

Kvennalið Keflavíkur er á mikilli siglingu í körfuboltanum en liðið vann sinn níunda sigurleik í röð á móti Haukum í gærkvöldi.

Keflavík vann leikinn 97-88 og hefur þar með unnið alla leiki sína í Domino´s deild kvenna frá og með 17. október eða alla leiki sína undanfarna 52 daga.

Tímabilið, það fyrsta undir stjórn Jóns Guðmundssonar, byrjaði ekki vel því Keflavíkurstelpurnar töpuðu tveimur fyrstu leikjum sínum á móti Stjörnunni og Snæfelli.

Keflavík tapaði 87-75 á móti Snæfelli í Stykkishólmi 6. október síðastliðinn en hefur síðan unnið öll hin sjö lið deildarinnar og gott betur. Þessi slæma byrjun kom mörgum á óvart en Keflavíkurkonur voru fljótar að yfirvinna mótlætið og komast á fullt skrið.

Þetta er nú orðin lengsta sigurganga Keflavíkurstelpnanna í sex ár eða síðan að liðið vann fjórtán sigurleiki í röð í deildinni frá október og fram í desember árið 2012.

Bandaríski bakvörðurinn Brittanny Dinkins var með þrennu á móti Haukum í gær (34 stig, 10 fráköst, 11 stoðsendingar) en þetta var þriðji leikurinn í röð þar sem hún er með yfir 43 í framlagi. Dinkins fékk 49 í framlag fyrir leikinn í gærkvöldi því auk þrennunnar var hún líka með 5 stolna bolta.

Þetta var fyrsta þrenna Dinkins á leiktíðinni en hana vantaði aðeins eitt frákast í þrennuna í leiknum á undan og var líka aðeins einni stoðsendingu frá þrennunni í fyrsta sigurleik liðsins á tímabilinu sem var á móti Skallagrími í október.

Reynsluboltinn Bryndís Guðmundsdóttir var með 17 stig og 9 fráköst á móti Haukum í gær en hún var að hækka stigaskor sitt í þriðja leiknum í röð. Embla Kristínardóttir átti líka sinn besta leik í vetur með 15 stig og 20 framlagsstig.

Lengstu sigurgöngur Keflavíkurkvenna á hverju tímabili undanfarin sjö tímabil:

2018-19: 9 sigurleikir í röð (17. október 2018 - enn í gangi)

2017-18: 6 sigurleikir í röð (1. nóvember - 6. desember 2017)

2016-17: 7 sigurleikir í röð (18. febrúar - 21. mars 2017)

2015-16: 2 sigurleikir í röð (7. - 11. nóvember 2015)

2014-15: 8 sigurleikir í röð (15. október - 29. nóvember 2014)

2013-14: 7 sigurleikir í röð (9. október - 3. nóvember 2013)

2012-13: 14 sigurleikir í röð (3. október - 12. desember 2012)