Segir Fossvogskirkju stefna í gröfina sökum fjárskorts

Formaður Kirkjugarðasambands Íslands segir að það vanti um 500 milljónir uppá rekstur kirkjugarða hér á landi og þær 50 milljónir sem fjárlaganefnd leggur til að renni til kirkjugarðanna sé skammgóður vermir. Ef ekkert verði að gert þurfi að loka Fossvogskirkju, líkhúsi og kapellu.

Meirihluti fjárlaganefnda Alþingis hefur lagt til að Kirkjugarðasamband Íslands fái tímabundið 50 milljóna króna framlag á næsta ári.

Þórsteinn Ragnarsson formaður Kirkjugarðasambandsins og forstjóri Kirkjugarða Reykjavíkurprófastsdæma segir að kirkjugarðar landsins hafi verið reknir með halla á síðustu árum. Forráðamenn sambandsins hafa farið nokkrum sinnum fyrir fjárlaganefnd og gert grein fyrir því.

„Við lögðum fram áætlun að sú skerðing sem orðin er sem er um 40% yrði leiðrétt á tveimur árum og til að byrja með yrðu 150 milljónir settar í árið 2019. Og við fengum 50 milljónir króna sem ber að þakka fyrir en nægir skammt, “ segir Þórsteinn.

Hann segir að reka megi vandann til hagræðingaraðgerða ríkistjórnarinnar í kjölfar efnahagshrunsins þegar einingarverð fyrir grafartöku og umhirðu var lækkað. Þetta hafi haft víðtæk áhrif.

„Kirkjugarðarnir hafa smá saman þurft að draga úr þjónustu, umhirðu og fækka fólki sem vinnur að umhirðu. Þeir hafa lent í vandræðum með að greiða verktökum fyrir grafartöku. Nú er svo komið að út á landsbyggðinni er búið að þrautpína verktaka til að vinna sjálfboðavinnu við að taka grafir. Þannig að við skiljum ekki þessa tregðu hjá stjórnvöldum,“ segir Þórsteinn.