Ari hættur með Skallagrím

Skallagrímur er án þjálfara í Domino's deild kvenna, Ari Gunnarsson er hættur sem þjálfari liðsins.

Meistaraflokksráð kvenna hjá Skallagrími sendi frá sér yfirlýsingu í gærkvöld þar sem kom fram að ráðið og Ari hafi komist að samkomulagi um að hann hætti þjálfun liðsins.

Ari tók við Skallagrími í upphafi þessa árs eftir að Spánverjinn Richardo Gonzales var rekinn úr starfi. Hann stýrði liðinu í úrslitakeppnina á síðasta tímabili en þar töpuðu Skallarnir fyrir Haukum í undanúrslitunum.

Skallagrímur er eins og er í sjötta sæti Domino's deildar kvenna, fjórum stigum frá fjórða sætinu og fjórum stigum frá botninum.