Andri Rúnar inn fyrir Jóhann Berg

Jóhann Berg Guðmundsson tekur ekki þátt í komandi landsleikjum Íslands gegn Belgíu og Katar. Andri Rúnar Bjarnason hefur verið kallaður inn í hans stað.

Jóhann Berg fór meiddur af velli í markalausu jafntefli Burnley og Leicester í gær og sendi KSÍ frá sér tilkynningu nú rétt í þessu þar sem greint er frá því að Jóhann yrði ekki í landsliðshópnum vegna meisla.

Í hans stað kemur Andri Rúnar Bjarnason sem var markahæsti leikmaður sænsku B-deildarinnar á tímabilinu sem lauk í gær.

Andri Rúnar á að baki tvo A-landsleiki og eitt mark.

Ísland mætir Belgíu, efsta liði heimslistans, í lokaleik sínum í Þjóðadeildinni nú á fimmtudaginn, 15. nóvember. Liðið leikur svo vináttulandsleik við Katar 19. nóvember, sá leikur fer einnig fram í Belgíu.