Donna Cruz ældi úr stressi eftir prufuna

Þau Donna Cruz og Kristinn Óli Haraldsson, betur þekktur sem Króli, hoppuðu bæði á tækifærið þegar þeim bauðst að leika í stórri íslenskri mynd með Kötlu Margréti Þorsteinsdóttur, Þorsteini Bachman og Birni Hlyni Haraldssyni. Kjartan Atli Kjartansson hitti þau bæði á Akranesi í Íslandi í dag á föstudaginn en þar er kvikmyndin tekin upp.

„Ég fékk bara símtal um að koma í prufu og seinna var haft samband við mig að ég hefði fengið hlutverkið sem er bara mjög gaman,“ segir Króli.

„Sko Gagga [Jónsdóttir, sem réði leikara í myndina] hafði semsagt samband við mig í gegnum Facebook. Ég hélt að þetta væri meira svona aukahlutverk. Svo fer ég í prufu og Silja Hauksdóttir, leikstjóri er þarna, Katla og Gagga. Ég var smá stressuð en þetta gekk rosa vel. Ég hélt kúlinu í smá stund en um leið og ég var komin út í bíl þá ældi ég úr stressi,“ segir Donna Cruz sem vakti fyrst athygli þegar hún var í samfélagsmiðlahópnum Áttunni.

Þrusuleikarar

Króli hefur smá reynslu úr leiklist.

„Það er reyndar bara eitthvað smávægilegt. Ég lék í Bjarnfreðarson þegar ég var tíu ára sem var mjög gaman og síðan hef ég verið í Þjóðleikhúsinu sem er frekar öðruvísi sérstaklega þegar tökudagar eru orðnir frekar margir,“ segir Króli.

„Þetta gengur mjög vel. Þau hafa bæði mikla reynslu í því að koma fram þó það sé ekki akkúrat með þessum hætti. Þannig að þau eru kannski ekki reynslumikil í bíóleik en er samt mjög reynslumikil og hafa mjög fjölhæfa reynslu. Svo eru þau bæði bara þrusuleikarar og skemmtileg, skapandi og klár bæði tvö.“

Titill myndarinnar er ekki ljós að svo stöddu en vinnutitillinn er Agnes Joy.

Hér að neðan má sjá innslagið í heild sinni frá því á föstudaginn.