Sænska þingið mun greiða atkvæði um Kristersson

Sænska þingið mun greiða atkvæði um Ulf Kristersson, formann hægriflokksins Moderaterna, sem nýjan forsætisráðherra Svíþjóðar. Atkvæðagreiðslan verður haldin mánudaginn 12. nóvember, en ekki er ljóst á þessari stundu hvort að meirihluti þings muni styðja Kristersson.

Andreas Norlén, forseti sænska þingsins, greindi frá ákvörðun sinni í morgun.

Eftir að Stefan Löfven, formaður Jafnaðarmanna og starfandi forsætisráðherra, skilaði stjórnarmyndunarumboði sínu um þarsíðustu helgi tilkynnti Norlén að hann myndi ekki veita neinum formanni nýtt umboð til stjórnarmyndunar. Þess í stað boðaði hann leiðtoga flokkanna til hópviðræða út frá fjórum tillögum að nýrri stjórn og fóru þær viðræður fram í síðustu viku.

Kristersson mun því næstu vikuna reyna að safna nægilegum stuðningi innan þingsins.

Tillögurnar sem Norlén nefndi í síðustu viku voru:

• Þjóðstjórn með Jafnaðarmönnum, Græningjum og borgaralegu flokkunum.
• Miðjustjórn með Jafnaðarmönnum, Græningjum, Miðflokknum og Frjálslyndum.
• Ríkisstjórn borgaralegu flokkanna og Græningja.
• Borgaraleg ríkisstjórn í einhverri mynd sem Kristersson hefur nefnt.

Afar snúin staða er á sænska þinginu eftir kosningarnar sem fram fóru 9. september síðastliðinn. Rauðgrænu flokkarnir náðu 144 þingsætum, borgaralegu flokkarnir 143 og Svíþjóðardemókratar 62.

Takist sænska þinginu ekki að samþykkja nýjan forsætisráðherra í fjórum tilraunum skal boðað til nýrra kosninga. Atkvæðagreiðslan um Kristersson á mánudaginn í næstu viku er sú fyrsta í röðinni. Það er forseti þingsins sem tilnefnir nýjan forsætisráðherra.