Hera verður Ásta Sóllilja hjá Balta

Hera Hilmarsdóttir mun fara með hlutverk Ástu Sóllilju í kvikmynd og sjónvarpsþáttum byggða á Sjálfstæðu fólki Halldórs Laxness sem Baltasar Kormákur mun leikstýra. Screen Daily greinir frá þessu. Áður hafði komið fram að Ingvar E. Sigurðsson mun fara með hlutverk Guðbjarts Jónssonar bónda, betur þekktur sem Bjartur í Sumarhúsum.

Baltasar hefur unnið margoft með Ingvari í gegnum tíðina, bæði sem leikarar og Ingvar í hlutverkum hjá Baltasar. Þá hafa Baltasar og Hera leitt saman hesta síma í kvikmyndinni Eiðurinn.

Enginn gæðamunur á sjónvarpi og bíó

Baltasar hefur skrifað handritið með Lilju Sigurðardóttur. Ekki liggur fyrir nákvæmlega hvenær tökur fara í gang en í viðtali við Baltasar í fyrra vonaðist hann að verkið yrði komið vel á veg innan tveggja ára.

Baltasar segir í viðtali við Screen Daily að úr verði ein eða fleiri kvikmyndir og þáttaröð, mögulega sex þættir. Það sé enginn gæðamunur lengur á kvikmyndum og sjónvarpsframleiðslu. Eini munurinn sé sá að þú fáir lengri tíma til að segja sögu í sjónvarpi.

„Þú verður að gefa myndinni þann tíma sem hún á skilið, enda nær bókin yfir 20-30 ára tímabil,“ segir Baltasar.

Baráttan fyrir sjálfstæði

Halldór Laxness skrifaði Sjálfstætt fólk á fjórða áratug síðustu aldar. Bókin kom upphaflega út í fjórum bindum á árinum 1933-1935. Er ætlað að hún gerist á árunum 1899-1921 í íslenskri sveit.

Þar segir frá þrjóska og hagyrta bóndanum Bjarti, fjölskyldu hans og örlögum þeirra. Barátta hans fyrir sjálfstæði og eigin landi er þyrnum stráð. Hann tekur við landi sem hafði ekki verið í byggð sökum reimleika, missir konu sína af barnsförum og er fjarri við leit að kindum þegar hún deyr.

Ásta Sóllilja lifði fæðinguna af og fjallar síðari hluti sögunnar að miklu leyti um Ástu Sóllilju og samskipti hennar við stjúpföður sinn.