Írsku farandverkamennirnir þrjátíu talsins og hafa komið í nokkrum hópum

Lögreglan á höfuðborgarsvæðinu hefur, síðan um miðjan september, haft til skoðunar málefni írskra farandverkamanna sem gengið hafa hús úr húsi og boðið fram þrif þjónustu.

Lögreglan hefur sent frá sér þrjár tilkynningar á samfélagsmiðlum vegna mannanna, annars vegar á höfuðborgarsvæðinu og hins vegar á Akureyri, en þeir hafa þótt einkar ágengir og hlaupa tilkynningar fólks til lögreglu um ferðir mannanna á mörgum tugum.

Skúli Jónsson, aðstoðaryfirlögregluþjónn hjá Lögreglunni höfuðborgarsvæðinu, hefur haft málefni mannanna til skoðunar og að vel hafi verið fylgst með þeim frá því þeir komu fyrst til landsins. Um sé að ræða þrjátíu manns sem hafa komið og farið í nokkrum hópum en þeir fyrstu komu til landsins 17. september. Svo virðist sem þeir hafi farið kerfisbundið í gegnum hverfi borgarinnar á síðustu sex vikum og boðið fram þjónustu sína.

Sjá einnig: Vara við boðum erlendra manna um garðaumhirðu og þvott á Akureyri

Lögreglan veit hverjir allir mennirnir eru

Skúli segir lögreglu hafa rætt við alla mennina og að upplýsingar um þá alla liggi fyrir. Þeim hafi verið leiðbeint um íslenskar reglur og viðskiptahætti og að á þessu stigi sé ekki sé hægt að áætla að þeir hafi brotið af sér. Hér hafi þeir heimildir til þess að dvelja og starfa, eftir settum reglum. þar sem þeir séu innan evrópska efnahagssvæðisins, sem Ísland á aðild að.



Skúli segir að framkoma mannanna og meintir viðskiptahættir, sem tilkynnt hafi verið um, séu öðruvísi en Íslendingar eigi almennt að venjast. Fólk hafi í sumum tilfellum verið óttaslegið en margir litið á þetta sem ónæði farandsölumanna og brugðist við vegna tilkynninga lögreglu á samfélagsmiðlum.

Samkvæmt upplýsingum fréttastofu kom í ljós að þegar tilkynningar til lögreglu voru teknar saman hafi komið í ljós að mennirnir hafi fyrst og fremst einbeitt sér að því að selja þjónustu til eldra fólks, sem í einhverjum tilfellum á erfiðara með að hafa samskipti við þá vegna tungumálaörðuleika. Meðal annars hafi risið upp ágreiningur um verð fyrir þjónustuna og er farandverkamönnunum borið á brýn að hafa hækkað verðið eftir að verki var lokið og að hafa gengið hart fram þegar rukkað var fyrir verkið. Þá hafi kaupendum reynst erfitt að fá greiðslukvittun af verki loknu.

Sjá einnig: Írsku farandverkamennirnir sakaðir um að hækka verðið að verki loknu

Til skoðunar hvort mennirnir tengist skipulagðri glæpastarfsemi

Skúli telur að mennirnir hafi annars vegar komið hingað til lands með flugi og hins vegar á bíl með Norrænu. Lögreglan hefur sent fyrirspurn um mennina til Europol, en ekki liggur fyrir hvort mennirnir eigi alvarleg brot á ferli sínum en sakaferill þeirra á Írlandi var meðal annars verið skoðaður.



Fyrir liggur að einhverjir mannanna þrjátíu séu tengdir fjölskylduböndum. Þeir hafa ekki orðið uppvísir af lögbroti hér á landi þó viðskiptahættir þeirra séu umdeildir. Skúli segir að til skoðunar sé hvort hópurinn sé hluti af skipulagðri glæpastarfsemi en nöfn einhverra mannanna hafa verið tengd við Rathkeale Rovers á Írlandi, en samtökin eru skilgreind glæpasamtök í landinu.



Sjö mannanna eru enn á landinu og eru þeir fyrir norðan. Skúli hvetur fólk til þess að fara varlega í viðskipti við mennina, en ræður fólki jafnframt frá því hafi það þess kost. Hann segir það til skoðunar hjá lögreglu hvernig brugðist verði við venji hópurinn komur sínar hingað til lands.