Kyrktur um leið og hann kom inn og líkið bútað niður

Sádiarabíski blaðamaðurinn Jamal Khashoggi var kyrktur um leið og hann steig inn á ræðisskrifstofu Sáda í Istanbúl í Tyrklandi. Lík hans var þvínæst bútað niður og er morðið sagt hafa verið skipulagt. Þetta kom fram í máli saksóknara í Tyrklandi á blaðamannafundi í dag.

Saksóknarinn sagði jafnframt að viðræður við saksóknara í Sádi-Arabíu hefðu ekki skilað neinum árangri, og að þarlend yfirvöld sýndu lítinn samstarfsvilja í málinu. Tilkynningin stangast enn fremur á við fullyrðingar Sáda þess efnis að Khashoggi hafi látist í slagsmálum sem brutust út á ræðisskrifstofunni.

Khashoggi var myrtur í byrjun þessa mánaðar og segja tyrknesk yfirvöld að morðið hafi verið þaulskipulagt af yfirvöldum í Sádi-Arabíu, en Khashoggi hafði verið afar gagnrýninn á stjórnarhætti í heimalandi sínu.