Guðný Árna gengin til liðs við Val

Guðný Árnadóttir hefur gengið til liðs við Val og mun spila með liðinu í Pepsi deild kvenna næsta sumar.

Guðný er fædd árið 2000 en á að baki 68 meistaraflokksleiki, þar af 49 í efstu deild. Hún er uppalin í FH og hefur spilað allan sinn meistaraflokksferil með liðinu.

Varnarmaðurinn ungi á marga landsleiki með yngri landsliðunum að baki og á árinu komst hún í A-landsliðshóp og tók þátt í þremur leikjum A-landsliðsins.

FH féll niður í Inkassodeildina í haust en Valur endaði í fjórða sæti Pepsi deildarinnar.