Tesla skilar hagnaði eftir „sögulegan fjórðung“

Bílaframleiðandinn Tesla skilaði hagnaði á þriðja fjórðungi ársins sem Elon Musk, stofnandi fyrirtækisins, lýsir sem „sögulegum“. Það er í fyrsta sinn frá árinu 2016 og var hagnaður fyrirtækisins 312 milljónir dala.



Tekjur Tesla á ársfjórðunginum voru 6,8 milljarðar dala, sem var vel fram úr væntingum greiningaraðila, samkvæmt Washington Post, og rúmlega tvöfalt meira en hagnaður fyrirtækisins á sama ársfjórðungi í fyrra.



Mikið hefur gengið á hjá fyrirtækinu á undanförnum mánuðum og hefur mikið kapp verið lagt í það að auka framleiðslu Tesla upp í fimm þúsund bíla á viku. Á undanförnum vikum hefur meðaltalið verið um 4.300 bílar en þar hefur þó mikill árangur náðst.

Aukin framleiðsla hefur verið lykilatriði í því að fyrirtækið skili hagnaði og hefur Musk heitið því að það sama verði á teningnum á fjórða ársfjórðungi ársins.

Forsvarsmenn Tesla ætla að hraða opnun verksmiðju í Kína til að framleiða og selja Model 3 bíla fyrirtækisins þar í landi. Vonast er til þess að fyrstu bílarnir verði seldir á næsta ári. Tollar gætu þó komið niður á tekjumöguleikum Tesla í Kína.