Innlent

Byggðu einbýli í Búðardal fyrir lóðarverð í borginni

Kristján Már Unnarsson skrifar
Húsið stendur við Ægisbraut, er 110 fermetrar að stærð auk 40 fermetra svefnlofts.
Húsið stendur við Ægisbraut, er 110 fermetrar að stærð auk 40 fermetra svefnlofts. Stöð 2/Egill Aðalsteinsson.
Fyrsta einbýlishúsið í áratug er risið í Búðardal, innflutt bjálkahús, sem sett var saman á staðnum. Eigendur segja að kostnaður verði á milli 20 og 26 milljónir króna. Þetta kom fram í fréttum Stöðvar 2. 

Hjónin Rosemary Lilja Ríkharðsdóttir og Björn Henrý Kristjánsson fluttu inn 13. september en fyrstu skóflustungu tóku þau 13. apríl í vor. 

„Föstudaginn 13. apríl! Við vorum svo djörf. Reyndar föttuðum það ekki fyrr en eftirá og krossuðum fingur,“ segir Rosemary.

Þau Björn Henrý Kristjánsson og Rosemary Lilja Ríkharðsdóttir fluttu inn í síðasta mánuði.Stöð 2/Egill Aðalsteinsson.
Hún er verslunarstjóri ÁTVR og starfsmaður dvalarheimilisins í Búðardal en hann bílstjóri og verktaki. Þau eru bæði aðflutt, hún úr Njarðvík en hann úr Dýrafirði. En hvernig datt þeim í hug að byggja hús í Búðardal? 

„Það var bara svo lítið um húsnæði hérna og okkur leið svo vel hérna, fluttum hingað fyrir fjórum árum síðan og vildum vera áfram. Eina valið var bara að byggja,“ svarar hún.

Úr stofunni horfa þau út á Hvammsfjörð, - þegar búið verður að fjarlægja gáminn fyrir framan.Stöð 2/Egill Aðalsteinsson.
„Það er líka kostur við það að byggja hérna úti á landi að þú þarft ekki að borga fleiri milljónir fyrir lóð. Við kannski komum húsinu upp hérna fyrir peninga sem sumir þurfa kannski að borga fyrir lóðina í bænum. 

Þannig að þið í Reykjavík, þið vitið að landsbyggðin er líka til,“ segir Björn.

Svefnloftið er 40 fermetrar.Stöð 2/Egill Aðalsteinsson.
Þetta er bjálkahús frá Lettlandi sem þau stöfluðu upp sjálf. Þau segjast gæla við að kostnaðurinn verði á bilinu 20 til 26 milljónir, en húsið er 110 fermetrar auk 40 fermetra svefnlofts. 

Ekki spillir staðsetningin á sjávarlóð með útsýni yfir Hvammsfjörð, eins og þau lýsa nánar hér í frétt Stöðvar 2:

 


Tengdar fréttir

Vísbendingar um markaðsbrest á íbúðamarkaði í Reykjavík

Ákveðinn markaðsbrestur er á húsnæðismarkaði í Reykjavík því það er lítið sem ekkert framboð af íbúðum á viðráðanlegu verði en mikið framboð af dýru húsnæði sem selst ekki. Þetta segir Sölvi Blöndal hagfræðingur og sérfræðingur í húsnæðismálum hjá Gamma. Hann segir að ekkert bendi til að snörp lækkun sé framundan á íbúðamarkaði þótt framboð nýbygginga sé að nálgast fyrri hæðir.

Lóðaverðið tífaldast á tíu árum

Skortur á lóðum og sala þeirra á milli fjárfesta þrýstir á hærra lóðaverð. Lóðaverð er nú 5 til 10 milljónir króna á hverja íbúð. Ódýrari lóðir og einfaldara byggingarregluverk þarf til að sinna húsnæðismarkaðinum.

Mest lesið


Fleiri fréttir

Sjá meira


×

Mest lesið