Hélt upp á 118 ára afmælið um helgina

Kona að nafni Julia Flores, eða „Mamma Julia“ eins og hún er jafnan kölluð, er líklegast elsta manneskja heims sem er á lífi í dag. Julia kemur frá Bólivíu og hélt upp á 118 ára afmælisdag sinn um helgina. Boðið var upp á tertu og tónlistaratriði í afmælisboðinu sem haldið var í bænum Sacaba.

Þrátt fyrir að vera orðin þetta gömul á hún nokkur ár í það að ná hæsta aldri sem vitað er að manneskja hafi náð.

Julia Flores kom í heiminn árið 1900 í námaborginni Potosí, en meðalaldurinn í Bólivíu er 71 ár.

Samkvæmt heimsmetabók Guinness er hin franska Jeanne Louise Calment sú sem hefur náð hæstum aldri, en hún varð 122 ára gömul og lést árið 1997.