Harry og Meghan eiga von á barni

Hertogahjónin af Sussex, Harry Bretaprins og Meghan Markle, eiga von á barni, að því er fram kemur í tilkynningu frá Kensingtonhöll. Erfinginn er fyrsta barn hjónanna og er væntanlegur í heiminn í vor.

„Hertogahjónin eru þakklát fyrir stuðninginn sem þeim hefur verið sýndur frá fólki víðsvegar um heiminn síðan þau gengu í hjónaband í maí og er þeim sönn ánægja að geta deilt þessum góðu fréttum með almenningi,“ segir jafnframt í tilkynningu.

Fjölmiðlar í Bretlandi hafa lengi velt því fyrir sér hvort hjónin ættu von á barni og hafa margir fylgst náið með Meghan. Svilkona hennar, Katrín, hertogaynja af Cambridge, og mágur, Vilhjálmur Bretaprins, eignuðust sitt þriðja barn, prinsinn Lúðvík, í apríl síðastliðnum.