Lægðirnar bíða í röðum eftir því að komast til Íslands

Umhleypingasamir dagur er fram undan enda bíða lægðirnar í röðum eftir því að komast til Íslands að mati vakthafandi veðurfræðings hjá Veðurstofunni. Næstu vikuna er útlit fyrir að fjórar lægðir úr suðri muni staldra við hér á landi.

„[Þ]etta er ansi algeng staða á haustin að lægðagangur sé mikill. Á milli þess að fá blautar, hlýjar og hvassar sunnan- og suðaustanáttir koma suðvestan- og vestanáttir með skúrum og ekki er ólíklegt að stundum verði slydduél eða él,“ segir ó hugleiðingum veðurfræðings á vef Veðurstofunnar.

Þar segir einnig að ekki séu miklar líkar á norðanáttum með kulda og ofankomu en engu að síður geti hæglega snjóað á fjallvegum, bæði þegar skil eru að koma inn á land og eins í svalari suðvestanáttum.

Veðurhorfur á landinu

Austan og norðaustan 8-15 og rigning með morgninum, einkum SA-til. Dregur smám saman úr vindi og úrkomu í dag, en gengur í allhvassa vestanátt SV-lands í kvöld og fer aftur að rigna.

Víða vestan hvassviðri um landið austanvert í nótt og rigning á köflum,en mun hægari vestantil og þurrt SA-lands. Lægir á morgun og styttir víða upp, en vaxandi sunnanátt allra vestast annað kvöld.

Hiti 1 til 10 stig, svalast í innsveitum norðanlands en mildast við suðausturströndina.

Veðurhorfur á landinu næstu daga

Á miðvikudag:

Vestan 8-15 en mun hvassara til fjalla á austanverðu landinu. Víða skúrir eða él, en þurrt suðaustan- og austanlands. Hiti 0 til 7 stig, mildast syðst.

Á fimmtudag:

Sunnan 10-15 og rigning, talsverð á Suður- og Suðausturlandi en úrkomulítið norðan Vatnajökuls. Hiti víða 5 til 10 stig.

Á föstudag:

Suðvestanátt og skúrir um landið vestanvert en þurrt austantil. Snýst í sunnanátt með rigningu um kvöldið en áfram úrkomulitið NA-til. Hiti 2 til 7 stig.