Nýliðarnir skelltu Haukum og ÍBV

Nýliðar HK í Olís-deild kvenna gerðu sér lítið fyrir og unnu eins marks sigur á ÍBV í Vestmannaeyjum í dag, 22-21.

Flestir bjuggust væntanlega við auðveldum Eyjasigri en HK tapaði sínum fyrsta leik í Olís-deildinni nokkuð örugglega á heimavelli gegn Haukum.

HK-stúlkur mættu ákveðnar til leiks í dag og voru yfir í hálfleik, 13-11. Þær unnu svo með marki á síðustu sekúndunni en þá skoraði Valgerður Ýr Þorsteinsdóttir, 22-21.

HK er því komið á blað í Olís-deildinni en Eyjastúlkur eru einnig með tvö stig eftir sigur á Stjörnunni í fyrstu umferð deildarinnar.

Arna Sif Pálsdóttir var markahæst hjá ÍBV með átta mörk en Díana Kristín Sigmarsdóttir gerði fjögur fyrir gestina gegn sínum gömlu félögum.

Það voru einnig óvænt úrslit á Ásvöllum þar sem hinir nýliðar deildarinnar, KA/Þór, gerðu sér lítið fyrir og skelltu Haukum, 24-23.

Nýliðarnir frá Akureyri voru tveimur mörkum yfir í hálfleik 15-13. Ekki var mikið skorað í síðari hálfleik en afar sterkur sigur gestanna.

Berta Rut Harðardóttir gerði átta mörk fyrir Haukastúlkur en Marta Hermannsdóttir gerði sjö fyrir norðanstúlkur og Sólveig Lára Kristjánsdóttir sex.