Ronaldo opnaði markareikninginn hjá Juve með tvennu

Juventus er enn með fullt hús stiga en meistararnir styrktu stöðu sína á toppi ítölsku úrvalsdeildarinnar með 2-1 sigri á Sassuolo í dag.

Það fór líklega ekki fram hjá neinum þegar Cristiano Ronaldo gekk í raðir ítölsku meistaranna í sumar en hann var enn í leit að sínu fyrsta marki fyrir félagið þegar kom að leiknum í dag.

Eftir markalausan fyrri hálfleik tók Ronaldo leikinn yfir í upphafi síðari hálfleiks og skoraði tvö mörk á fimmtán mínútna kafla. Kom hann þar með Juventus í þægilega stöðu.

Gestirnir í Sassuolo gáfust þó ekki upp og Khouma Babacar klóraði í bakkann í uppbótartíma. Nær komust þeir þó ekki og lokatölur 2-1.

Brasilíumaðurinn Douglas Costa sýndi af sér glataða hegðun í uppbótartíma þar sem hann uppskar tvö gul spjöld og þar með rautt en seinna gula spjaldið fékk hann fyrir að hrækja framan í leikmann Sassuolo.