Misjafnt gengi síðustu tveggja bikarmeistara í fyrsta leik eftir bikarfögnuð

Bikarmeistarar Stjörnunnar spila í kvöld mikilvægan leik í toppbaráttu Pepsideildar karla í fótbolta en þetta er líka fyrsti leikur Garðabæjarliðsins eftir að liðið tryggði sér sigur í Mjólkurbikarnum.

Stjörnumenn taka á móti KA á Samsung vellinum í Garðabæ en leikurinn hefst klukkan 18.00 og er í beinni Stöð 2 Sport 4.

Stjarnan getur minnkað forystu Vals á toppnum í eitt stig með sigri en misstígi Garðbæingar sig og tapi leiknum þá geta Valsmenn tryggt sér Íslandsmeistaratitilinn í næstu umferð.

Stjarnna vann 2-1 sigur á KA í fyrri leiknum á Akureyri en á dögunum hjálpuðu KA-menn Stjörnumönnum í toppbaráttunni með því að taka stig af Valsmönnum fyrir norðan.

Stjörnumenn þurfa nú að koma sér niður á jörðina eftir fyrsta bikarmeistaratitil félagsins.

Það er óhætt að segja að það hafi verið ýmist í ökkla eða eyra hjá síðustu tveimur bikarmeisturum í fyrsta leik sínum eftir bikarfögnuðinn.

Eyjamenn unnu bikarinn í fyrra en töpuðu síðan á heimavelli á móti Víkingi úr Ólafsvík í næsta leik. Þetta var síðasti sigur Víkinga á tímabilinu en þeir fengu aðeins 3 stig í síðustu sjö leikjum sínum og féllu úr deildinni.

Árið áður fóru nýkrýndir bikarmeistarar Vals aftur á móti á kostum í 7-0 heimasigri á Víkingum úr Reykjavík. Kristinn Freyr Sigurðsson, Kristinn Ingi Halldórsson og Sigurður Egill Lárusson skoruðu allir tvö mörk í leiknum. Sigurður Egill hafði skorað bæði mörkin í bikaúrslitaleiknum.

Frá því að bikarúrslitaleikurinn var færður aftur inn á tímabilið sumarið 2010 hafa nýkrýndir bikarmeistarar fagnað sigri í 4 af 8 leikjum sínum eftir bikarfögnuðinn. Það má sjá alla þessa leiki hér fyrir neðan.

Fyrsti leikur bikarmeistara eftir bikarúrslitaleik 2010-2017:

2017 ÍBV vann 1-0 sigur á FH í bikarúrslitaleik 12. ágúst

Fyrsti leikur: 1-0 tap á heimavelli á móti Víkingi Ó. 16. ágúst  [TAP]

2016 Valur vann 2-0 sigur á ÍBV í bikaúrslitaleik 13. ágúst

Fyrsti leikur: 7-0 sigur á heimavelli á Víkingi R. 18. ágúst   [SIGUR]

2015 Valur vann 2-0 sigur á KR í bikarúrslitaleik 15. ágúst

Fyrsti leikur: 1-1 jafntefli á útivelli á móti Fjölni 20. ágúst [JAFNTEFLI]

2014 KR vann 2-1 sigur á Keflavík í bikarúrslitaleik 16. ágúst

Fyrsti leikur: 1-0 sigur á heimavelli á móti Fjölni 20. ágúst [SIGUR]

2013 Fram vann Stjörnuna í vítakeppni í bikarúrslitaleik 17. ágúst

Fyrsti leikur: 3-2 tap á útivelli á móti Stjörnunni 22. ágúst  [TAP]

2012 KR vann 2-1 sigur á Stjörnunni í bikarúrslitaleik 18. ágúst

Fyrsti leikur: 3-1 sigur á útivelli á FH 23. ágúst [SIGUR]

2011 KR vann 2-0 sigur á Þór í bikarúrslitaleik 13. ágúst

Fyrsti leikur: 2-1 sigur á Þór á útivelli 18. ágúst [SIGUR]

2010 FH vann 4-0 sigur á KR í bikaúrslitaleik 14. ágúst

Fyrsti leikur: 3-1 tap á útivelli á móti Grindavík 19. ágúst  [TAP]