Þarf að gera eins og Gulli frændi og stofna bakvarðaskóla til að fá alvöru samkeppni

Birkir Már Sævarsson, hægri bakvörður íslenska landsiðsins í fótbolta, bjóst ekkert endilega við því að vera hluti af liðinu á þessum tímapunkti þar sem að hann tók þá ákvörðun að fara heim til Vals að spila í Pepsi-deildinni á síðasta ári.

En, eins og alltaf er hann mættur og er enginn sem ógnar þessum frábæra og trausta bakverði í stöðu hans. Hann er einna öruggastur um sitt sæti þegar að Erik Hamrén velur sitt fyrsta byrjunarlið fyrir leikinn á móti Sviss á laugardaginn.

„Ég er alltaf valinn þannig að ég mæti,“ segir Birkir hress og kátur en viðurkennir að það kemur honum svolítið á óvart að vera enn í bláu æfingatreyjunni að undirbúa sig fyrir landsleik.

„Þegar að ég fór heim síðasta vetur hugsaði ég að ég myndi kannski fá að klára HM og svo yrði þessu slaufað. Það hefði verið allt í lagi því að ég bjóst svo sem við því. En, það eru enn þá not fyrir mig,“ segir hann.

Til í vængbakvörðinn

Náfrændi Birkis er fyrrverandi landsliðsmarkvörðurinn Gunnleifur Gunnleifsson sem ver mark Breiðabliks í Pepsi-deildinni. Gunnleifur hefur lengi verið með sinn eigin markvarðaskóla og kannski þarf Birkir að gera eitthvað svipað til að finna arftaka sinn.

„Ég kannski geri eins og Gulli frændi og stofna skóla fyrir mína stöðu. En í alvöru eru fullt af mönnum sem eru á leiðinni upp. Það eru bakverðir í unglingalandsliðunum og það er bara spurning fyrir þá um að taka skrefið. Það þarf oft ekkert svo mikið til. Þetta er oft spurning um heppni og rétt val á félagsliði. Það gæti allt í einu einhver bakvörður dottið inn og við þurfum bara að vona að það gerist. Þangað til mæti ég á meðan einhver vill hafa mig,“ segir Birkir.

Valsarinn eldfljóti segir vissulega mun á því að æfa með Val og íslenska landsliðinu þó svo að æfingar Valsmanna séu frægar fyrir að vera hraðar og harðar.

„Það er hærra tempó á landsliðsæfingunum og leikmennirnir eru betri, það segir sig sjálft. Maður þarf að færa sig upp á það tempó þó að maður reyni að vera þannig allan tímann. Maður þarf alltaf að vera betri með landsliðinu. Viðbrigðin eru ekki mikil en alltaf eitthvað smá,“ segir Birkir en hvernig líst honum á hugmynd Erik Hamrén um að spila með vængbakverði. Það myndi þýða enn meiri hlaup.

„Það er allt í lagi. Ef það er eitthvað sem ég get þá er það að hlaupa. Það er ekki eitthvað sem að hræðir mig. Mig hefur alltaf langað til að spila þessa vængbakvarðastöðu. Hún hefur alltaf heillað mig. Ef það dúkkar upp er ég til í að prófa það,“ segir Birkir Már Sævarsson.