Stuðningsmenn Barcelona SC fórust í bílslysi

Hið minnsta tólf stuðningsmenn ekvadorska knattspyrnufélagsins Barcelona SC eru látnir eftir bílveltu í gærkvöld. Þar að auki eru um 30 slasaðir. Stuðningsmennirnir höfðu ferðast með rútu eftir leik félagsins gegn Deportivo Cuenca, sem leikur heimaleiki sína í borginni Cuenca.

Tildrög slyssins eru óljós á þessari stundu. Samgönguyfirvöld landsins segja þó að ekkert hafi verið að rútunni og að hún hafi flogið í gegnum ástandsskoðun í febrúar síðastliðnum. Vitni greina frá því í samtali við þarlenda miðla að ökumaður rútunnar hafi misst stjórn á bílnum þegar hann reyndi framúrakstur á miklum hraða. Opinberar tölur gefa til kynna að um sjö einstaklingar láti lífið daglega í Ekvador í umferðarslysum. Um 96% slysanna má rekja til mannlegra mistaka að sögn breska ríkisútvarpsins.

Barcelona SC er eitt vinsælasta knattspyrnuliðið í Ekvador og eru stuðningsmenn þess rómaðir fyrir kröftugan stuðning á áhorfendapöllunum. Stjórnarformaður liðsins segir að slysið sé mikið áfall og að komið verði upp kapellu í leikvangi Barcelona SC þar sem stuðningsmannanna verður minnst.

Knattspyrnusamband Ekvadors, auk fjölda félagsliða, hafa vottað Barcelona SC, stuðningsmönnum þess og aðstandendum hinna látnu, samúð sína.