Fullyrðir að Þórður hafi verið fullur og boðið leikmönnum upp á herbergi

Þóra Björg Helgadóttir, fyrrverandi landsliðsmarkvörður, segir að þjálfari kvennalandsliðsins í knattspyrnu hafi á sínum tíma verið ölvaður í landsliðsverkefni og boðið leikmönnum upp á herbergi til sín. Hann hafi auk þess hvorki þekkt leikmenn með nafni né vitað hvaða stöðu þær spiluðu.

Þetta kom fram í erindi Þóru á ráðstefnu um jafnrétti í íþróttum sem fram fór í Háskólanum í Reykjavík í dag. Þóra Björg spilaði á sínum tíma 108 landsleiki fyrir Ísland og er af flestum talin besti markvörður sem Ísland hefur alið í kvennaboltanum.

Erindi Þóru bar yfirskriftina „Girl in a man's world - A story from a former professional player“ sem mætti þýða sem „Frásögn fyrrverandi atvinnumanns - kona í karlaheimi.“

Neituðu að spila undir stjórn Þórðar

Umræddur þjálfari er Þórður Georg Lárusson þótt Þóra hafi ekki nefnt hann á nafn í erindi sínu. Hann tók við stjórn kvennalandsliðsins af Vöndu Sigurgeirsdóttur árið 1999 og stýrði liðinu í þremur leikjum. Mótmæli leikmanna, þar sem tíu neituðu að spila yrði hann áfram þjálfari, urðu til þess að hann sagði starfi sínu lausu en þá hafði liðið gert tvö jafntefli og tapað einum leik.

Þórður sagði í viðtali við Fréttablaðið árið 2013 að um hópefli hefði verið að ræða. Nefndi hann landsliðskonuna Eddu Garðarsdóttur og Þóru sérstaklega í því samhengi. Lýsti hann því að hann hefði ekki átt annan kost en að hætta. Þáverandi formaður KSÍ, Eggert Magnússon, og þáverandi landsliðsþjálfari karla, Atli Eðvaldsson, hafi bent honum á það.

„Þeir sögðu að ég gæti aldrei átt síðasta orðið gegn konum í knattspyrnu,“ sagði Þórður í viðtalinu árið 2013.

Segist ekki eiga orð

Vísir náði stuttlega tali af Þórði vegna málsins nú síðdegis. Hann sagðist ekki eiga orð yfir frásögninni og ætlaði að hafa samband síðar og svara ásökununum.

„Þetta segir allt um þessa konu,“ sagði Þórður.

Þá kom fram í erindi Þóru að einn leikmaður landsliðsins hefði hætt í kjölfarið á því að landsliðskonurnar neituðu að spila undir stjórn Þórðar. Hún sagðist hafa haft samband við viðkomandi leikmann fyrir erindi sitt og beðið hana afsökunar á því að hafa ekki staðið betur við bak hennar á sínum tíma.

Ekki náðist í Eggert Magnússon, fyrrverandi formann KSÍ, við vinnslu fréttarinnar.

Uppfært 18:24.

Í fréttinni var rangt haft eftir Þórði þar sem ritað var að hann hafi sagt „Þetta segir allt um þessar konur“, þegar átti að standa „Þetta segir allt um þessa konu.“ Þórður segir það af og frá að hann hafi eitthvað á móti konum. Hann segist ekki ætla að tjá sig nánar um málið að svo stöddu.