Allt þarf að ganga upp svo Dagný nái mikilvægustu leikjum ársins

Dagný Brynjarsdóttir, leikmaður íslenska kvennalandsliðsins í fótbolta, er ekki farin af stað í boltanum eftir barnsburð en hún eignaðist sitt fyrsta barn í byrjun júní.

Öll íslenska þjóðin vonast til þess að Dagný geti verið með í mikilvægustu leikjum kvennalandsliðsins í langa tíma þegar að liðið mætir Þýskalandi og Tékklandi í byrjun september í undankeppni HM 2019.

Ísland er í bílstjórasæti í riðlinum með 16 stig, stigi meira en stórveldið Þýskaland og er búið að vinna þýska liðið einu sinni. Sigur á Tékklandi og jafntefli gegn Þýskalandi á Laugardalsvellinum í september tryggir Íslandi farseðilinn á HM í fyrsta sinn.

„Ég ætla ekki að búa til einhver óþarfa meiðsli með því að fara fyrr af stað. Ég ætla bara að ná mér. En fyrir utan það er standið á mér gott,“ segir Dagný í viðtali við Morgunblaðið í dag.

Miðjumaðurinn magnaði samdi við uppeldisfélagið Selfoss á dögunum en er ekki byrjuð að spila. Hún getur mest náð fjórum leikjum í Pepsi-deild kvenna áður en landsliðið kemur saman og mætir Þýskalandi 1. september. Er raunhæft að hún nái leiknum?

„Það þarf allt að ganga upp. Auðvitað horfi ég á það úr fjarska en það er ekki eins og ég sé að keppa við tímann til þess að verða vonsvikin,“ segir Dagný sem var einnig að glíma við meiðsli í aðdraganda EM í fyrra.

„Þetta er ekki eins og þegar ég var að ná mér af meiðslum fyrir EM. Ef ég fer of snemma af stað gæti ég þurft að eiga við meiðsli eitthvað fram á næsta tímabil og ég nenni ekki að standa í því,“ segir Dagný Brynjarsdóttir.