Mikill munur á laxgengd milli landhluta

Þegar veiðitölur liðinnar viku eru skoðaðar sést vel hvað það munar miklu á milli landshluta í laxgangd en það liggur í loftinu að sumarið sé heldur slapt á norður og austurlandi.

Þetta er hins vegar vel yfir meðallagi sumar í ánum á vesturlandi og eins virðast heimtur í ánum á suðurlandi yfirleitt vera í lagi.  Ef við skoðum aðeins betur árnar á norðurlandi og berum saman við hvað var að gerast í fyrra þá getum við byrjað á aflahæstu ánni á norðurlandi sem er Miðfjarðará.  Þar hafa nú veiðst 1.058 laxar og vikuveiðin er upp á 299 laxa svo Miðfjarðará eins og venjulega stendur alveg upp úr ánum á norðurlandi og er varla hægt að bera hana saman við hinar.

Blanda hefur gefið 668 laxa með vikuveiði upp á 153 laxa en var á sama tíma í fyrra með 913 laxa.  Selá í Vopnafirði hefur gefið 492 laxa en í fyrra var veiðin 390 laxar svo hún er aðeins 102 löxum undir en árið í fyrra var svo sem ekkert hennar besta ef við berum saman veiðiárin eftir árið 2000.  Laxá í Aðaldal hefur ekki farið varhluta af skorti á smálaxi en þar hafa veiðst 350 laxar á móti 374 löxum á sama tíma í fyrra.  Laxá á Ásum hefur gefið 355 laxa en í fyrra var talan 438 laxar og það sumar endaði í 1108 löxum en það skal vakin athygli að það er aðeins veitt á fjórar stangir í ánni.  Hofsá og Sunnudalsá hafa gefið 280 laxa en 160 laxa á sama tíma í fyrra.  Það mætti telja svona áfram en það er nokkuð ljóst að það er á brattann að sækja norðan heiða.  

Af veiðitölum að dæma virðist því stefna í sumar sem verður líklega í meðallagi á vesturlandi en fréttir úr flestum þeirra bendir til að það séu ennþá ágætis göngur og gott vatn svo það verður spennandi að fylgjast með framhaldinu.