Segja landgræðslu við Kárahnjúka hafa gengið betur en búist var við

Bændur af Jökuldal, sem annast landgræðslu við Kárahnjúka, segja að mun betur hafi gengið að græða svæðið upp en vonir stóðu til. Þeir segjast einstaka sinnum finna fyrir áfoki niður í byggð. Frá þessu var greint í fréttum Stöðvar 2. 

Þegar við nálguðumst Kárahnjúkastíflu á dögunum mátti sjá talsverðan rykmökk þyrlast upp af bökkum Hálslóns, en lónið var myndað með stíflugerðinni. Áfokið virtist þó ekki ná út fyrir svæðið þótt talsvert blési.

Í yfir sexhundruð metra hæð yfir sjávarmáli rekumst við á bændur við landgræðslu. Þeir eru af Jökuldal og eru í verktöku hjá Landsvirkjun að dreifa áburði. 

„Það er verið að dreifa hérna 72 tonnum þetta árið í kringum Kárahnjúka og inn með Hálslóni og hluti af þessu fer svo á Eyjabakka, á Hraunasvæðið,“ segir Jón Björgvin Vernharðsson, bóndi á Teigaseli 2 á Jökuldal. 

Bændurnir voru að dreifa í Desjarárdal við Fremri-Kárahnjúk, neðan Desjarárstíflu, á svæði sem var gróðurlítil auðn þegar framkvæmdirnar stóðu yfir fyrir rúmum áratug.  Athyglisvert er að það dugar að dreifa eingöngu áburði en uppgræðslan hófst árið 2007.

„Ég trúði því eiginlega ekki að það væri hægt að vera í landgræðslu svona hátt, - upphaflega þegar var byrjað á þessu. Það var farið í tilraunaverkefni fyrst, aðeins frá þessu svæði, og síðan bara virkaði það svo vel að það var bara dúndrað af fullum krafti hér í,“ segir Agnar Benediktsson, bóndi á Hvanná 2 á Jökuldal. 

Við sjáum að svæðið er orðið vel gróið, áratug eftir að framkvæmdum lauk. 

„Já, já, þetta er rosalega skemmtilegt landgræðslusvæði með það að gera að við sjáum mun meiri árangur heldur en meira að segja verktakarnir trúðu,“ segir Jón Björgvin.

Með Hálslóni var sökkt um 32 ferkílómetrum af grónu landi en með þessum aðgerðum fæst nýtt gróðurlendi í staðinn. 

„Og þetta er náttúrlega líka til þess að fanga ef það er eitthvað moldrok úr bökkunum. Landgræðsla er langbesta vopnið við áfoki.“ 

-Finnið þið niðri í dal fyrir foki héðan? 

„Einstaka sinnum. Ekki eitthvað sem er stöðugt,“ svarar Agnar. 

„En þegar koma langvarandi vestanáttir, og ekki komið meira í lónið, þá getur fokið aðeins úr þessu. Það er ekkert mjög oft. En þegar það gerist þá verður það dálítið öflugt,“ svarar Jón Björgvin.

Hér má sjá frétt Stöðvar 2: