Von á samfelldri rigningu

Búast má við því að það byrji að rigna nokkuð samfellt sunnan- og vestanlands í kvöld þegar skil frá lægð sem er nú um 500 kílómetra vestur af Reykjanesi verða komin upp að landinu.

Þetta kemur fram í hugleiðingum veðurfræðings á vef Veðurstofunnar en þar segir að lægðin sé nú á hægri leið austur og vegna hennar þykkni meira upp um sunnan- og vestanvert landið með deginum. Því megi búast við dálítilli rigningu eða súld síðdegis með sjávarsíðunni en annars verður skýjað og þurrt.

Þá verður þurrt og bjart norðan og austan til í dag en loftið er nokkuð óstöðugt og er því von á stöku síðdegisskúrum á Austurlandi sem og á norðanverðum Austfjörðum.

„Í kvöld verða samskilin frá lægðinni komin að landinu og byrjar þá að rigna nokkuð samfellt sunnan- og vestanlands en hann hangir þurr norðaustantil. Styttir upp á morgun með deginum þegar að lægðin er fer framhjá landinu, en aftur er útlit fyrir síðdeigsskúrum norðaustantil á morgun. Hiti 10 til 18 stig, hlýjast á Norðausturlandi í dag en á Suðurlandi á morgun,“ segir í hugleiðingum veðurfræðings.

Nánar um veðurhorfur á landinu í dag og næstu daga:

Suðlægátt, 3-8 m/s og þykknar upp um vestanvert landið með deginum. Yfirleitt þurrt fram á kvöld en dálítil súld með suðvesturströndinni og skúrir norðaustantil. Suðaustan 5-10 í kvöld og rigning sunnan- og vestanlands en léttskýjað um landið austanvert.

Hæg norðlæg á morgun og styttir upp og rofar til sunnan- og vestanlands en skyjað með köflum norðaustantil og stöku skúrir þar síðdegis. Hiti 10 til 18 stig, hlýjast á Norðausturlandi í dag en á Suðurlandi á morgun.

Á fimmtudag:

Hæg norðlæg eða breytileg átt og lítilsháttar rigning um landið sunnan- og vestanvert en þar rofar til með deignum. Skyjað með köflum norðaustanlands en stöku skúrir þar síðdegis. Hiti 10 til 17 stig, hlýjast á Suðurlandi.

Á föstudag:

Suðvestan 5-13 og rigning, en þurrt um landið austanvert fram eftir degi. Hiti 8 til 17 stig, hlýjast norðaustanlands.

Á laugardag:

Hæg vestlæg átt en strekkingur með Suðurströndinni. Skýjað og dálítil rigning eða skúrir, en þurrt suðaustantil. Hiti 8 til 16 stig, hlýjast Suðaustanlands.

Á sunnudag:

Vestlæg átt, 3-10 en norðlægari norðanlands. Víða dálítil væta en þurrt suðaustantil. Hiti breytist lítið.