Weinstein ákærður fyrir ofbeldi gegn þriðju konunni

Saksóknari í Manhattan í New York hefur ákært Harvey Weinstein, kvikmyndaframleiðanda, vegna kynferðisbrots gegn konu sem átti sér stað árið 2006. Weinstein hefur áður verið ákærður vegna brota gegn tveimur öðrum konum.

AP-fréttastofan segir að nýju ásökununum hafi verið bætt við ákæru vegna brota sem áttu sér stað árin 2004 og 2013. Konan sakar Weinstein um að hafa neytt hana til munnmaka í júlí fyrir tólf árum.

Weinstein hefur neitað sök og lögmaður hans hefur dregið trúverðugleika kvennanna í efa. Önnur þeirra sakar Weinstein um að hafa nauðgað sér á hótelherbergi. Þá sakar Lucia Evans, fyrrverandi leikkona, Weinstein um að hafa sömuleiðis neytt sig til munnmaka á skrifstofu hans árið 2004.