16 laxar á land fyrsta daginn í Langá

Langá á Mýrum opnaði fyrir veiði í gær en áin opnaði að þessu sinni tveim dögum fyrr en venjulega.

Það er óhætt að segja að áin hafi komið á óvart en mikið líf var á neðri svæðum hennar og greinilega nokkuð af laxi að ganga.  Fyrsti laxinn kom á land á Breiðunni neðan við Skugga sem er einn skemmtilegasti veiðistaðurinn í ánni á þessum tíma þegar lax er að ganga.  Það var mikið af tveggja ára laxi í afla dagsins en stærstu laxarnir voru 85 sm og 80 sm sem veiddust í Bárðarbungu.  Lax veiddist á Hrafnseyri sem er nokkuð ofarlega í ánni og laxar sáust víðar.

Heildartala dagsins var 16 laxar og miðað við gang mála verða næstu holl í góðum málum.  Gott vatn er í ánni miðað við síðustu tvö ár en vatnið í ánni núna er svipað og það var við opnun 2015 sem var eitt besta árið í Langá þegar 2.616 laxar veiddust í ánni.  Sumarið í fyrra var líka gott þrátt fyrir erfið skilyrði lengst af í ágúst vegna brakandi sólskins en þá veiddist 1.701 lax í ánni.