Eldar í nágrenni Manchester

Rúmlega 50 heimili hafa verið rýmd vegna gríðarlegra elda sem geisa í nágrenni ensku borgarinnar Manchester.

Eldur kom upp í mýrlendi skammt frá borginni á sunnudag og hefur logað nær sleitulaust síðan. Heitt var á svæðinu í gær og urðu þurrkar og hlýr vindur til þess að auka útbreiðslu eldsins.

Breski herinn er sagður í viðbragðsstöðu vegna eldanna en ekki hafa borist neinar fregnir af eigna- eða manntjóni.

Slökkviliðsmenn búast við því að þurfa að kljást áfram við eldinn næstu daga. Um 10 slökkviliðsbílar og þyrlur séu notaðar í aðgerðunum en eldsupptök liggja ekki fyrir.

Nánar má fræðast um málið á vef breska ríkisútvarpsins.