Helgi Kolviðs: Gylfi og Aron eru á áætlun

„Staðan á liðinu er mjög góð. Frábært að fá alla inn í gær inn í okkar umhverfi því það er mikið af upplýsingum sem við þurfum að koma til skila til strákanna,“ segir Helgi Kolviðsson aðstoðarlandsliðsþjálfari en það er í mörg horn á líta hjá þjálfurunum þessa dagana.

„Það eru tveir fundir á dag en þó aðallega núna um upplýsingaflæði því það er margt sem þarf að koma á framfæri í svona stóru verkefni.“

Lykilmennirnir Gylfi Þór Sigurðsson og Aron Einar Gunnarsson eru báðir að koma til baka eftir meiðsli og Helgi er bjartsýnn á að þeir verði í lagi.

„Gylfi er búinn að vera lengur hjá okkur og hefur æft á fullu. Það þarf frekar að bremsa hann af frekar en hitt. Gylfi er á réttu róli. Aron er líka á áætlun. Það eru allir að gera allt til þess að þeir verði í toppstandi á réttum tíma.“

Helgi segir að það geti verið að Gylfi taki einhvern þátt í leiknum gegn Noregi annað kvöld. Það sem öllu skipti samt er að vera skynsamur.