Flugvél brotlenti í Kinnarfjöllum

Ekki er talið að alvarleg meiðsl hafi orðið á tveimur farþegum fjögurra sæta flugvélar sem brotlenti í Kinnarfjöllum rétt norðan af Ljósavatni við Húsavík eða í fjöllunum á milli Akureyrar og Húsavíkur í kvöld. Kalt er á vettvangi og var tjaldi og svefnpokum kastað til fólksins úr annarri flugvél. Tveir björgunarsveitarmenn sem voru á svæðinu á eigin vegum voru fyrstir á vettvang og hlúðu að fólkinu þar til þyrlu Landhelgisgæslunnar var flogið á staðinn.

Fólkið var síðan flutt til aðhlynningar á sjúkrahús á Akureyri og lenti þyrlan þar klukkan 23:11.

Björgunarsveitir á norðaustanverðu landinu voru kallaðar út og fóru um tíu hópar af stað.

Samkvæmt upplýsingum frá Landhelgisgæslunni bárust neyðarboð til stjórnstöðvar Landhelgisgæslunnar í gegnum gervihnattaneyðarsendi. Gæslan hafði samband við flugumsjón á Akureyri, sem hafði samband við flugmann vélarinnar. Hann staðfesti að flugvélin hefði brotlent. Samkvæmt Lögreglunni á Norðurlandi eystra var aðgerðaráætlun vegna flugslysa virkjuð og aðgerðastjórn sett upp á Akureyri og Húsavík.

Vélin fór niður við Skálaárvatn á Kinnarfjöllum, suðvestur af Húsavík, um fimm kílómetra suðvestur af bænum Syðri-Leikskálaá.

Aðstæður á vettvangi voru góðar, heiðskírt en kalt í veðri. Þyrlan Landhelgisgæslunnar tók á loft frá Reykjavík klukkan 21:45 og var henni lent fyrir norða um klukkan ellefu.

Fulltrúar Rannsóknarnefndar samgönguslysa fóru með þyrlu Landhelgisgæslunnar norður og eru rannsóknarlögreglumenn frá auk fulltrúa nefndarinnar á vettvangsrannsókn. Áhöfn þyrlunnar mun aðstoða þá og verða þeir að á slysstað eitthvað fram á nótt.