Kanaríveður og hvassviðri

Norðausturhorn landsins mun njóta fádæma veðurblíðu í dag og á morgun ef marka má spákort Veðurstofunnar. Ætla má að hitinn þar kunni að fara yfir 20 stig í dag og jafnvel upp í 22 stig á morgun. Til samanburðar segir á vef Veðurstofunnar að það sé „u.þ.b. hitastigið á Kanaríeyjum þessa dagana.“ Þá verður jafnframt léttskýjað norðaustantil og vindurinn verður hægur.

Hið sama er hins vegar ekki upp á teningnum annars staðar á landinu. Nú í morgunsárið liggja skil við vesturströndina og þeim fylgir allhvöss suðaustanátt og rigning um vestanvert landið. Hviður við fjöll geta farið í 30 m/s svo að aðgátar er þörf á flestum vegum milli þéttbýlisstaða að sögn Veðurstofunnar. Seinni partinn fer þó að draga úr vindi. Hitinn verður þó ágætur, á bilinu 8 til 16 stig.

Það stefnir svo í mun hægari vind á morgun með lítilsháttar vætu sunnan- og vestanlands, en áfram bjart og hlýtt norðaustantil.

Veðurhorfur á landinu næstu daga

Á miðvikudag:

Suðlæg átt 3-10 m/s. Skýjað og smásúld S- og V-lands með hita 8 til 13 stig. Bjartviðri NA-til og hiti 15 til 22 stig.

Á fimmtudag:

Vestlæg átt 3-8 m/s. Víða skýjað og sums staðar súld við ströndina. Hiti 8 til 18 stig, hlýjast SA-til.

Á föstudag:

Vestlæg átt, 5-13 m/s, hvassast NV-lands og yfirleitt skýjað, en bjart á köflum um landið austanvert. Hiti breytist lítið.

Á laugardag og sunnudag (sjómannadagurinn):

Suðvestlæg átt og dálítil væta V-lands, en bjart með köflum A-til. Hiti 8 til 18 stig, hlýjast á austanverðu landinu.

Á mánudag:

Útlit fyrir hæga suðlæga átt og bjart fyrir norðan, annars úrkomulítið. Hlýnar heldur.