Birtir lista yfir þá sem fluttu lögheimili sitt í Árneshrepp

Kristinn H. Gunnarsson, fyrrverandi alþingismaður og Vestfirðingur, birtir á heimasíðu sinni í kvöld lista yfir fólk sem hann segir að hafi flutt lögheimili sitt í Árneshrepp á Ströndum dagana fyrir 5. maí síðastliðinn.

Þó nokkuð hefur verið fjallað um málið í dag þar sem Þjóðskrá hefur nú ákveðið að skoða lögheimilisflutninga sautján einstaklinga í kringum síðustu mánaðamót en Árneshreppur er fámennasta sveitarfélag landsins. Fjölgun íbúa nemur því 38 prósentum.

Kristinn segir á vef sínum að miðað við íbúaskrá Árneshrepps virðast nýir íbúar í hreppnum vera átján talsins en ekki sautján. Íbúaskráin virðist ekki aðgengileg á vefnum hjá neinum opinberum aðila með þeim hætti sem Kristinn birtir nöfn íbúanna en við þau stendur úr hvaða sveitarfélagi viðkomandi flutti lögheimili sitt. Listann sem Kristinn birti í kvöld má sjá neðst í fréttinni. 

Sagðar málamyndaskráningar

Blaðamaður fletti upp þeim nöfnum í þjóðskrá sem Kristinn birtir og það passar að viðkomandi einstaklingar eru skráðir með lögheimili í Árneshreppi.

Hins vegar er ekki hægt að sjá hvenær einstaklingur flutti lögheimili sitt en Hrafn Jökulsson, einn af þeim sem eru á listanum, staðfesti í samtali við Vísi að hann hefði nýlega flutt lögheimili sitt í hreppinn.

„Ég tók ákvörðun um það fyrir löngu að fara á mínar gömlu slóðir fyrir norðan, hef búið þarna og haft tengsl við þessa sveit í 40 ár. Það er bara óháð og ég er eins og margir ungir menn að gefast upp á húsnæðisskorti í Reykjavík þannig að það er gott að flytja sig um set í sveitina. Annars skipti ég mér ekkert af þessum hvelli sem hefur orðið enda hef ég satt að segja ekki haft tíma til þess að kynna mér fréttir af þessu enda snýst allt um skákina núna hjá okkur,“ segir Hrafn en hann er forseti Hróksins sem nú stendur fyrir skákmaraþoni til styrktar börnum í Jemen.

Í minnisblaði sem lögmannsstofan Sókn vann vegna lögheimilisskráninganna fyrir Árneshrepp eru þær sagðar bera með sér að vera „málamyndaskráningar“ vegna komandi sveitarstjórnarkosninga. Mikil átök hafa verið í hreppnum undanfarin misseri vegna fyrirhugaðrar Hvalárvirkjunar og er það stærsta kosningamálið.

Samkvæmt lögum um kosningar til sveitarstjórna getur það varðað sektum að gefa villandi upplýsingar um meðal annars ef maður telur sig til málamynda eiga lögheimili í sveitarfélagi. Er það verkefni lögreglunnar að rannsaka slík mál ef þau koma upp.

Í samtali við mbl.is í kvöld sagði Ástríður Jóhannesdóttir, sviðsstjóri stjórnsýslusviðs Þjóðskrár Íslands, að til að eiga lögheimili á tilteknum stað þarf fólk, samkvæmt lögheimilislögum, að eiga þar fasta búsetu.

Listinn sem Kristinn H. Gunnarsson birti fyrr í kvöld:

Drangar:

Brynhildur Sæmundsdóttir f. 1928      Reykjavík

Snorri Páll Jónsson                   Reykjavík

Ásgeir Örn Arnarson                   Reykjavík

Ólína Margrét Ásgeirsdóttir           Hvammi, Hellu

Sighvatur Lárusson                    Hvammi, Hellu

Kristín Ómarsdóttir                   Reykjavík

Óskar Kristinsson                     Akranes

Fríða Ingimarsdóttir                  Akranes

Kristján E. Karlsson                  Reykjavík

Bryndís Hrönn Ragnarsdóttir           Reykjavík

Gunnhildur Hauksdóttir                Reykjavík

 

Seljanes:

Lára Valgerður Ingólfsdóttir          Reykjavík

Jón Leifur Óskarsson f. 1937          Reykjavík

Birkir Jónsson                        Reykjavík

 

Kaupfélagshús:

Hrafn Jökulsson                       Reykjavík

Þórhildur Hrafnsdóttir                Reykjavík

Róshildur Arna Ólafsdóttir            Akureyri

Helga Österby Þórðardóttir