31 dagur í HM: Skúrkurinn sem varð að hetju í ótrúlegum seinni hálfleik

Flestir fótboltamenn hafa lent í því á ferlinum að sinna ekki varnarvinnunni nógu vel eða gera mistök sem leiða til þess að andstæðingurinn skori. Oftast eru stuðningsmennirnir fúlir í smá stund eftir á, kannski nokkra daga, en það svo gleymist og lífið heldur áfram. Það er annað þegar mistökin gerast á stærsta sviðinu.

Lilian Thuram er leikjahæsti leikmaður í sögu franska landsliðsins. Hann er einn af þeim sem reis upp úr fátækt og náði að upplifa sína stærstu drauma, fór frá því að spila fótbolta á götum Fontainebleau-hverfisins í París í lokakeppni HM með franska landsliðinu. Af öllum 142 landsleikjunum sem Thuram hefur spilað stendur undanúrslitaleikurinn árið 1998 líklega hvað hæst í minnum hans.

Frakkar voru á heimavelli og þrátt fyrir stjörnur eins og Zinedine Zidane og Thierry Henry voru Frakkar aðeins í 25. sæti heimslistans fyrir mótið og höfðu ekki komist í síðustu tvær lokakeppnir.

Eftir að hafa farið í gegnum riðlakeppnina með fullt hús stiga reyndist útsláttarkeppninn þeim erfiðara fyrir. Laurent Blanc skoraði sigurmark í framlengingu í 16-liða úrslitum gegn Paragvæ og þurfti vítaspyrnukeppni til þess að sigra Ítala í 8-liða úrslitunum.

Þá var komið að undanúrslitunum. Þar mættu þeir Króötum á þjóðarleikvangnum Stade de France, liði sem fór auðveldlega í gegnum Þjóðverja í 8-liða úrslitunum.

Eftir nokkuð atvikalausan fyrri hálfleik var komið að Thuram að stíga fram á sjónarsviðið. Hann byrjaði seinni hálfleikinn eins illa og hægt var, gaf Króötum mark á silfurfati. Það eina sem hann hefði getað gert verr væri ef hann hefði skorað markið sjálfur og gert sjálfsmark.

Í hárri pressu Frakka var Thuram ekki með á nótunum og spilaði Davor Suker réttstæðan þrátt fyrir að Suker, sem er formaður Knattspyrnusambands Króatíu í dag, væri langt fyrir innan sína næstu varnarmenn. Hann fékk því nóg pláss til þess að skora fyrsta mark leiksins. Frakkar voru svo nálægt draumnum, að vinna HM á heimavelli, en Thuram virtist hafa eyðilagt hann.

Hinn þá 26 ára Thuram ætlaði sér þó ekki að vera skúrkurinn sem fór með HM drauminn. Aðeins mínútu seinna vann hann boltann við eiginn teig og byrjaði ótrúlegan sprett upp völlinn. Með einföldu, en markvissu, þríhyrningsspili við Bixente Lizarazu var Thuram kominn í kjörstöðu til þess að hamra boltann í netið. Ótrúlegar tvær mínútur og staðan aftur jöfn.

Það var eins og einhver hærri máttarvöld hefðu skrifað handrit þessa leiks því hver annar en Lilian Thuram skoraði sigurmarkið fyrir Frakka á 69. mínútu, þeir voru á leiðinni í úrslitaleikinn á HM í sínu eigin landi. Frakkar urðu svo heimsmeistarar með 3-0 sigri á Brasilíu en það er aldrei að vita hvernig sagan hefði orðið hefði Thuram ekki gefið þetta mark sem án efa kveikti í honum að gera betur og sanna sig.

„Ég vissi ekki hver ég var eða hvar ég var, það var eins og ég væri í leiðslu,“ sagði Thuram seinna meir þegar hann var beðinn um að lýsa tilfinningum sínum eftir að seinna markið lá í netinu. „Þegar ég stóð á vellinum eftir úrslitaleikinn trúði ég þessu ekki. Ég, heimsmeistari? Fæddur á Guadeloupe, fátækur krakki frá París, heimsmeistar? Nei, enn þann dag í dag trúi ég þassu ekki.“

Titillinn 1998 er sá eini sem Frakkar eiga í sínum verðlaunaskáp. Þeir hefja leitina að næsta heimsmeistaratitli 16. júní, sama dag og við Íslendingar hefjum leik, gegn Ástralíu í Kazan.

Vísir telur niður fyrir HM í knattspyrnu sem hefst í Rússlandi þann 14. júní. Íþróttafréttamenn Vísis munu fylgja íslenska landsliðinu eftir hvert fótmál ytra.