Skotið á bílalest Mayweather

Einn af lífvörðum boxarans Floyd Mayweather varð fyrir skoti er ráðist var á bílalest boxarans í Atlanta í gær.

Mayweather og félagar voru að keyra um í þremur bílum er árásin var gerð. Mayweather var ekki í bílnum sem skotið var á og er ómeiddur. Sá er var skotinn er laus af spítala. Hann fékk skotið í fótinn og slapp vel.

Talsmaður lögreglunnar í Atlanta segir að svo virðist vera sem þessi skotárás hafi ekki verið handahófskennd.

Mayweather og félagar voru á leið af næturklúbbi upp á hótel er bíll, sem var við hlið þeirra, hóf skothríð. Árásarmennirnir eltu svo bílalest Mayweather í nokkurn tíma áður en þeir létu sig hverfa.