Telja að Sindri hafi átt sér vitorðsmann við flóttann

Yfirlögregluþjónn á Suðurnesjum segir að fullyrða megi að fanginn Sindri Þór Stefánsson hafi átt vitorðsmann í flótta sínum frá landinu.

Talið er að Sindri hafi strokið frá fangelsinu á Sogni um klukkan eitt í nótt með því að klifra út um glugga. Er hann talinn hafa farið af landi brott með flugi Icelandair til Arlanda-flugvallar í Stokkhólmi um klukkan hálf átta í morgun, eða rétt áður en lögreglu barst tilkynning um flótta hans. 

„Það má alveg fullyrða að það hafi verið vitorðsmaður. Við erum akkúrat að skoða það núna,“ segir Gunnar Schram yfirlögregluþjónn á Suðurnesjum.

Fyrir liggur að Sindri ferðaðist á nafni annars manns en myndir úr öryggismyndavélakerfi Flugstöðvar Leifs Eiríkssonar staðfesta að Sindri var á ferðinni þar. Spurður hvort að vitorðsmaður Sindra sjáist á eftirlitsmyndavélum flugstöðvarinnar segir Gunnar að það sé í skoðun.

Skoða hvort hann hafi farið til annars lands

Spurður hvort vitað sé til þess að Sindri hafi flogið til einhvers annars lands frá Svíþjóð segir Gunnar Schram að lögreglan á Arlanda-flugvelli sé með það til skoðunar.

Gunnar segir ekki vitað hvort Sindri ferðaðist til Svíþjóðar á fölsuðu vegabréfi. Hann segir að það sé mismunandi eftir flugfélögum hvort framvísa þurfi vegabréfi ef ferðast á til landa innan Schengen-svæðisins.

Ef farþegar innrita sig á netinu og ferðast aðeins með handfarangur geta þeir í sumum tilvikum sloppið með að framvísa vegabréfi. Það fari í raun eftir flugfélaginu hvort að farþegar séu beðnir um að framvísa vegabréfi þegar þeir fara um borð í flugvélina eða hvort að innritunarpassi nægi. 

„Já, það má segja það,“ segir Gunnar Schram þegar hann er spurður hvort að Sindri gæti í raun verið kominn hvert sem er en segir lögreglu þó ekki vera búna að gefa upp von um að finna hann.

Í gæsluvarðhaldi vegna Bitcoin-máls

Sindri hefur sætt gæsluvarðhaldi frá 2. febrúar vegna rannsóknar lögreglu á umfangsmiklum þjófnaði á tölvubúnaði. Fyrst var hann í gæsluvarðhaldi á grundvelli rannsóknarhagsmuna á Hólmsheiði. Undanfarna tíu daga hefur hann verið í varðhaldi á grundvelli almannahagsmuna að Sogni sem er opið fangelsi, þar sem föngum er treyst til þess að fara hvergi. Það komi niður á þeim bregðist þeir því trausti að sögn fangelsismálastjóra.

Búnaðurinn er hluti af þýfinu í þremur innbrotum í gagnaver í Reykjanesbæ og í Borgarbyggð frá desember til janúar þar sem 600 tölvum að verðmæti 200 milljónum króna var stolið. Grunur leikur á að málið gæti teygt anga sína til annarra landa. Voru tölvurnar sérbúnar til að grafa eftir rafmyntinni Bitcoin.

Sogn er opið fangelsi en Páll Winkel fangelsismálastjóri sagði í samtali við Vísi í morgun að algengt væri að gæsluvarðhaldsfangar væru vistaðir þar. Færi það eftir því hvort þeir væru taldir hættulegir. Sindri var ekki talinn hættulegur eða líklegur til að flýja þegar ákveðið var að vista hann á Sogni.