Hátt í tuttugu stiga frost við Mývatn

Tveggja stafa frosttölur mældust í nótt á mælistöðvum í flestum landshlutum. Heiðríkja er á nánast öllu landinu og vindur hægur.

„Má þar nefna uppsveitir Suðurlands og Faxaflóa, innsveitir á Norðvesturlandi og kaldast í byggð varð á Norðausturlandi þar sem mældist 18.4 stiga frost í nótt við Mývatn. Enn kaldara varð á hálendinu og þar ber hæst 21.8 stiga frost á Kárahnjúkum, 22.8 stig á Brúarjökli og 25.2 stig á Dyngjujökli,“ segir í hugleiðingum veðurfræðings á vef Veðurstofu Íslands.

Áfram er útlit fyrir hægan vind og heiðríkju á stórum hluta landsins í dag.

„Þó ber að nefna að svolítil lægðabóla nálgast nú Vestfirði og eftir hádegi má búast við suðvestan 8-13 m/s af hennar völdum á norðvestanverðu landinu. Lægðin sendir einnig dálítinn éljagarð inn á vestanvert landið og má því búast við stöku éljum á þeim slóðum þegar kemur fram á daginn,“ segir í hugleiðingum veðurfræðings.

Heilt yfir er gert ráð fyrir rólegu veðri á landinu um helgina. Lítið sem ekkert verður um úrkomu en áfram verður kalt að nætulagi.

Veðurhorfur á landinu

Hæg breytileg átt og víða léttskýjað. Gengur í suðvestan 8-13 m/s á norðvestanverðu landinu eftir hádegi og þá stöku él vestanlands. Vestlæg átt 3-10 á morgun. Bjart veður sunnan- og austanlands. Él við norðurströndina og einnig lítilsháttar él á vestanverðu landinu framan af degi. Hiti að 6 stigum sunnanlands yfir daginn, en kringum frostmark fyrir norðan og austan. Kaldara að næturlagi.



Veðurhorfur á landinu næstu daga

Á laugardag:

Vestlæg átt 3-8 m/s, en 8-13 nyrst á landinu. Léttskýjað sunnan- og austanlands. Él við norðurströndina og einnig lítilsháttar él á vestanverðu landinu framan af degi. Hiti að 6 stigum sunnanlands yfir daginn, en kringum frostmark annars staðar á landinu.

Á sunnudag:

Hæg suðaustlæg átt og léttskýjað, en 5-10 með suðurströndinni og skýjað. Hiti 0 til 5 stig að deginum, en um og undir frostmarki norðan- og austanlands.

Á mánudag:

Suðaustan og austan 3-8 og bjartviðri, en 8-13 sunnanlands og dálítil rigning eða slydda af og til. Hiti breytist lítið.

Á þriðjudag:

Sunnan 5-13 og rigning með köflum, en bjart á Norður- og Austurlandi. Hvessir seinnipartinn, sunnan 13-20 um kvöldið og bætir í rigningu. Hlýnandi veður, hiti 3 til 9 stig undir kvöld.

Á miðvikudag:

Sunnan 10-18 í fyrstu og rigning, en þurrt um landið norðaustanvert. Snýst í heldur hægari suðvestanátt vestantil um hádegi með skúrum. Hiti 3 til 8 stig, en kólnar um kvöldið.

Á fimmtudag:

Suðvestan 5-13 á Suður- og Vesturlandi og dálitlir skúrir eða slydduél. Hægari sunnanátt austanlands og rigning, en styttir upp seinnipartinn. Þurrt á Norðurlandi. Hiti 1 til 7 stig.