Stjarna Valgarðs skein skært í Höllinni

Íslandsmótinu í fimleikum lauk um helgina. Á laugardaginn var keppt í fjölþraut í áhaldafimleikum og í gær var keppt á einstökum áhöldum. Glæsileg tilþrif sáust á fjölum Laugardalshallarinnar og umgjörðin var með besta móti.

Valgarð Reinhardsson úr Gerplu átti góða helgi og getur gengið afar sáttur frá borði. Hann varð Íslandsmeistari í fjölþraut og vann Íslandsmeistaratitilinn á fjórum áhöldum í gær.

Í fjölþrautinni hafði Valgarð betur í baráttu við liðsfélaga sinn hjá Gerplu, Eyþór Örn Baldursson. Valgarð fékk 74,232 stig á móti 72,697 stigum Eyþórs. Stefán Ingvarsson úr Björk varð þriðji með 67,431 stig.

Í gær vann Valgarð sigur á svifrá, tvíslá, gólfi og hringjum. Hann endaði svo í 2. sæti á bogahesti á eftir Arnþóri Jónassyni úr Gerplu. Annar Gerplumaður, Guðjón Bjarki Hildarson, varð hlutskarpastur í stökki.

Ólympíufarinn Irina Sazanova varði Íslandsmeistaratitil sinn í fjölþraut. Hún fékk 50,050 stig. Liðsfélagi hennar úr Ármanni, Dominiqua Alma Belányi, varð önnur með 48,200 stig. Agnes Suto Tuuha og Thelma Aðalsteinsdóttir úr Gerplu voru jafnar í 3. og 4. sæti með 48,150 stig.

Vigdís Pálmadóttir varð Íslandsmeistari unglinga í fjölþraut. Guðrún Edda Min Harðardóttir og Emilía Sigurjónsdóttir, einnig úr Björk, lentu í 2. og 3. sæti.

Martin Bjarni Guðmundsson úr Gerplu varð Íslandsmeistari unglinga í fjölþraut karlamegin. Í 2. og 3. sæti urðu Jónas Ingi Þórisson, Ármanni, og Breki Snorrason, Björk.

Stjarna gærdagsins í kvennaflokki var hin 15 ára Margrét Lea Kristinsdóttir úr Björk. Hún sýndi frábær tilþrif og hrósaði sigri á slá og gólfi, eða báðum áhöldunum sem hún keppti á. Margrét Lea er á sínu fyrsta ári í fullorðinsflokki.

Irina varð Íslandsmeistari á tvíslá og Agnes vann sigur í stökki.