Forsætisráðherra útilokar ekki gjaldtöku í vegakerfinu

Katrín Jakobsdóttir, forsætisráðherra, kveðst ekki útiloka gjaldtöku í vegakerfinu á leiðum þar sem aðrar leiðir eru í boði, það er að segja þar sem hægt er að komast á áfangastað á annarri leið en þeirri sem þarf að borga fyrir, líkt og er raunin með Hvalfjarðargöng. Þetta kom fram í svari Katrín við óundirbúinni fyrirspurn Þorgerðar Katrínar Gunnarsdóttur, þingmanns Viðreisnar, á Alþingi í dag.

Þorgerður Katrín gerði þar fjárframlög til samgöngumála í nýrri fjármálaáætlun ríkisstjórnarinnar að umtalsefni. Sagði hún að samkvæmt áætluninni væri fjárfesting í vegakerfinu ekki eins og vænst hafði verið til og sagði að hlutfallslega væru framlög til vegamála að minnka á áætlunartímanum ef tekið væri tillit til þess hversu mikið umferð mun aukast.

Rifjaði upp orð Katrínar á landsfundi VG

Þorgerður Katrín rifjaði síðan upp orð Katrínar Jakobsdóttur sem hún lét falla á landsfundi Vinstri grænna í október síðastliðnum, skömmu fyrir þingkosningar.

„Þar minntist hún meðal annars á að það væri gripið til gervilausna, eins og hún orðaði það, í heilbrigðis-og samgöngumálum, og sagði þá einstaklinga sem ræddu einkaframkvæmd og gjaldtöku væru eingöngu að því vegna þess að þeir treystu sér ekki til þess að byggja upp innviðina eins og vera ber. [...] Nú hlýt ég að spyrja hæstvirtan forsætisráðherra, í ljósi orða samgönguráðherra hæstvirts, að það verði að fara að horfa og líta til annarra leiða, til gjaldtöku, til þess að hraða vegaframkvæmdum, hefur þetta verið rætt innan ríkisstjórnar og mun forsætisráðherra styðja samgönguráðherra í því að skoða gjaldtökur á þær leiðir sem eru til þess fallnar að hraða samgönguframkvæmdum?“ sagði Þorgerður Katrín.

Sagði Vinstri græn vera orðin ágætis gervitungl fyrir Sjálfstæðisflokkinn

Katrín svaraði því til að samkvæmt fjármálaáætlun væri farið í sérstakt átak í samgöngumálum og benti á að á áætlunartímabilinu ætti að setja 124 milljarða í vegakerfið. Það skipti miklu máli en hún gæti hins vegar tekið undir það með Þorgerði Katrínu sem og Sigurði Inga Jóhannssyni, samgönguráðherra, að þeir fjármunir myndu ekki leysa allan vandann.

„Eins og ég hef bent á hefur fjárfesting í innviðum verið í sögulegu lágmarki á undanförnum árum. Hæstvirtur ráðherra hefur sagt að hann sé reiðubúinn að skoða gjaldtöku á leiðum þar sem aðrar leiðir eru möguleiki. Það er vissulega í takt við það sem við höfum séð áður gert. Það var til að mynda gert á sínum tíma í Hvalfjarðargöngunum. Þar var gjaldtakan rökstudd með því að önnur leið væri möguleg. Ég hef ekki lokað á slíka gjaldtöku, aldrei nokkurn tímann,“ sagði Katrín.

Þorgerður Katrín kvaðst líta svo á að Katrín væri þarna farin frá ræðu sinni á landsfundi VG í október síðastliðnum.

„Þá talaði hún meðal annars um ágæt fylgitungl Sjálfstæðisflokksins. Ég get ekki lesið það betur en svo að Vinstri græn séu nú orðin ágætis gervitungl með þeim flokki miðað við hver afstaðan er til gjaldtöku í samgönguframkvæmdum,“ sagði Þorgerður Katrín.

Hún bætti því svo við að það skipti máli að horfast í augu við veruleikann og það þætti henni núverandi samgönguráðherra gera auk þess sem forveri hans í starfi hefði gert slíkt hið sama.

„Það þarf meira fjármagn og þýðir ekki að loka augunum fyrir því að við verðum að leita allra leiða. Fjármálaáætlunin segir blákalt við okkur sem byggjum meðal annars á því að keyra um landið að ekki sé verið að fjárfesta nægilega í vegaframkvæmdum. Það þarf að leita allra leiða. Þess vegna fagna ég því að hæstvirtur forsætisráðherra sé tilbúin til að fara í þá leið með okkur.“

Sagðist auðvitað ekki vera að hverfa frá fyrri sýn

Katrín svaraði Þorgerði á þann veg að hún gæti skemmt sér við „einhverja svona kerskni og látið eins og hér sé verið að hverfa frá fyrri sýn.“ Sagði Katrín að auðvitað væri svo ekki.

„Samgönguáætlun sem hér var samþykkt 2016 var ekki fjármögnuð. Munurinn á þessari fjármálaáætlun og þeirri sem háttvirtur þingmaður stóð að á sínum tíma er að nú er samgönguáætlunin sem var samþykkt á þingi 2016 fjármögnuð. Það er munurinn. Það er það sem ég var að vísa í. Það dugir ekki annað en að horfa til þess hvernig við getum fjármagnað innviðina og fylgt því sem Alþingi hefur samþykkt og ekki hefur verið gert hingað til, því miður.

 

Ég ætla að minna á að hæstvirtur forseti sem var fjármálaráðherra og hefur verið í flokki með þeirri sem hér stendur alllengi var sá sem stóð meðal annarra fyrir því að koma á gjaldtöku í Hvalfjarðargöngum með nákvæmlega þeim rökstuðningi sem ég fór yfir hér áðan. Við höfum aldrei útilokað gjaldtöku ef aðrar leiðir eru mögulegar. Við höfum hins vegar sett fram verulegar efasemdir um að setja gjaldskylduhlið til að mynda í kringum höfuðborgarsvæðið, sem er ein af þeim hugmyndum sem hafa verið til umræðu,“ sagði forsætisráðherra.