Jovica Cvetkovic, sem leikmenn sögðu hafa verið blindfullan á EM í Króatíu, hefur verið rekinn sem landsliðsþjálfari Serbíu. Það geta vart talist óvænt tíðindi.
Hann stýrði Serbum í tólfta sætið á EM og það getur hann þakkað sigri á Íslandi í lokaleik riðlakeppninnar. Sigur sem sendi Ísland heim og Serba áfram í milliriðil þar sem liðið tapaði öllum sínum leikjum.
Eftir að þjálfarinn hafði sakað leikmenn Serba um að fara út að skemmta sér á mótinu og bóka flugmiða heim, þar sem þeir gerðu ráð fyrir að tapa gegn Íslandi, þá stóðu leikmenn upp og sendu frá sér yfirlýsingu.
Í henni stóð meðal annars að það hefði varla runnið af Cevtkovic allt mótið. Hann hefði ekki mætt á æfingar og skilið eftir himinháan reikning á hótelherbergi sínu þar sem hann sat að sumbli. Það er nú ekki dýrt að fá sér í könnu í Króatíu og því lágu ansi margir drykkir í valnum miðað við reikninginn.
Stjórn serbneska handknattleikssambandsins fundaði um stöðu Cvetkovic í gær og ákvað að reka hann úr starfi. Tíu vildu reka hann en aðeins einn greiddi atkvæði með því að halda honum í starfi.
Drykkjurúturinn rekinn frá Serbum
Tengdar fréttir
Kornið sem fyllt mælinn: Sagði leikmenn vera búna að bóka flugmiða heim fyrir Íslandsleikinn
Leikmenn serbneska landsliðsins í handbolta hafa komið fram og sagt frá ótrúlegri framgöngu landsliðsþjálfara síns á meðan Evrópumótið í handbolta fór fram í Króatía. Það var mikið í gangi á bak við tjöldin hjá liðinu sem sendi strákana okkar heim af mótinu.
Landsliðsþjálfari Serba var fullur á hliðarlínunni á EM í handbolta
Leikmenn serbneska landsliðsins í handbolta sendu í dag frá sér yfirlýsingu vegna landsliðsþjálfarans Jovica Cvetkovic og framkomu hans á Evrópumótinu í handbolta í Króatíu í janúar.
