Kjartan pólítískur ráðgjafi Eyþórs

Kjartan Magnússon, núverandi borgarfulltrúi, hefur tekið að sér að vera pólítískur ráðgjafi Eyþórs Arnalds, borgarstjóraefnis Sjálfstæðisflokksins.

Þetta kemur fram í tilkynningu frá Sjálfstæðisflokknum. Þar segir jafnframt að verði Eyþór borgarstjóri að loknum kosningum í vor muni Kjartan verða aðstoðarmaður hans í því embætti.

Athygli vakti að þegar raðað var niður á lista Sjálfstæðisflokksins í Reykjavík fyrir sveitarstjórnarkosningarnar mátti ekki finna nafn Kjartans þar, sem starfað hefur áram saman innan borgarstjórnarflokks Sjálfstæðismanna.

Vísir greindi frá því í vikunni að Kjartani væri ætlað stórt hlutverk innan Sjálfstæðisflokksins og að horft væri til þess að hann yrði aðstoðarmaður Eyþórs ef Sjálfstæðisflokkurinn tæki við völdum í borginni.

Þá hefur flokkurinn einnig tilkynnt að Janus Arn Guðmundsson stjórnmálafræðingur hafi verið ráðinn framkvæmdastjóri borgarstjórnarflokks Sjálfstæðisflokksins.