LeBron James sá um Celtics

Cleveland Cavaliers saknaði ekki Isaiah Thomas þegar liðið ferðaðist til Boston og mætti heimamönnum í Celtics í NBA deildinni í körfubolta í nótt.

LeBron James fór fyrir Cavaliers með 24 stig, 10 stoðsendingar og átta fráköst. Gestirnir komust í 27 stiga forystu um miðjan fjórða leikhluta og sigldu heim 121-99 sigri.

Boston hefur nú tapað síðustu þremur af fjórum leikjum sínum og misst toppsæti Austurdeildarinnar til Toronto Raptors.

Raptors með DeMar DeRozan fremstan í flokki sóttu Charlotte Hornets heim og unnu öruggan 20 stiga sigur, 123-103. Liðið hefur nú unnið síðustu fimm leiki sína.

Sex leikmenn Raptors náðu tveggja stafa tölu í stigaskori og þrír voru með yfir 20 stig í sannkölluðum liðssigri en liðið náði ótrúlegri 48,6 prósenta skotnýtingu úr þriggja stiga skotum í leiknum.

18-2 áhlaup Raptors í byrjun seinni hálfleiks kláraði leikinn fyrir gestina eftir að staðan hafði verið 62-55 í hálfleik.

Minnesota Timberwolves vann sinn þrettánda heimasigur í nótt þegar liðið tók á móti Sacramento Kings þrátt fyrir 17 tapaða bolta.

Kings var með forystuna mestan part leiksins en tveir þristar í röð frá Karl-Anthony Towns og Jeff Teague þegar rúmar fimm mínútur voru eftir af leiknum komu Minnesota í forystu, 93-92. Sacramento svaraði fyrir sig hinu meginn en þá setti Jamal Crawford niður annan þrist og kom Timberwolves aftur í forystu sem liðið missti ekki niður aftur heldur tók 111-106 sigur.

Úrslit næturinnar:

Charlotte Hornets - Toronto Raptors 103-123

Atlanta Hawks - Detroit Pistons 118-115

Boston Celtics - Cleveland Cavaliers 99-121

Indiana Pacers - New York Knicks 121-113

Houston Rockets - Dallas Mavericks 104-97

Minnesota Timberwolves - Sacramento Kings 111-106

Oklahoma City Thunder - Memphis Grizzlies 110-92

Portland Trail Blazers - Utah Jazz 96-115