Eygló nýr stjórnarformaður LÍN

Lilja Alfreðsdóttir, mennta- og menningarmálaráðherra hefur skipað Eygló Harðardóttur stjórnarformann stjórnar Lánasjóðs íslenskra námsmanna.

Eygló kemur inn í stjórnina ásamt Lárus Sigurði Lárussyni Sigrúnu Elsu Smáradóttur og Teiti Birni Einarssuni, tilnefndan af fjármála- og efnahagsráðherra, í stjórn Lánasjóðs íslenskra námsmanna.

Hlutverk stjórnar sjóðsins er meðal annars að veita námslán, innheimta námslán, annast gagnasöfnun varðandi þörf námsmanna á námslánum, og annast fjármál sjóðsins og gerð fjárhagsáætlana. Stjórnin setur úthlutunarreglur sem eru lagðar fram til kynningar og staðfestar af ráðherra eigi síðar en 1. apríl ár hvert.

Eygló er fyrrverandi félags- og húsnæðismálaráðherra og samstarfsráðherra Norðurlandanna 2013-2016. Hún var alþingismaður fyrir Framsóknarflokkinn frá 2009-2017 og sat meðal annars í menntamálanefnd 2009 – 2011, og allsherjar- og menntamálanefnd 2011 og 2017.

Lárus Sigurður Lárusson er nýr varaformaður stjórnar en hann hefur meistarapróf í lögum auk málflutningsréttinda og starfar sem lögmaður hjá Lögmönnum Sundagörðum. Áður var hann lögfræðingur hjá Samkeppniseftirlitinu og þar áður hjá Persónuvernd.

Sigrún Elsa Smáradóttir er matvæla og viðskiptafræðingur MBA. Sigrún starfaði sem markaðsstjóri 1996-2008 og var varaborgarfulltrúi og borgarfulltrúi 1998-2010. Sigrún Elsa hefur einnig setið í stjórn Sparisjóðs Bolungarvíkur, stjórn Lánatryggingarsjóðs Kvenna og var varamaður í bankaráði Seðlabankans. Í dag starfar Sigrún Elsa sem framkvæmdastjóri Iceland Exclusive Travel.

Teitur Björn Einarsson er skipaður samkvæmt tilnefningu fjármála- og efnahagsráðherra. Hann hefur lokið prófi í lögum auk málflutningsréttinda. Teitur var alþingismaður fyrir Sjálfstæðisflokkinn 2016-2017 og var aðstoðamaður fjármála- og efnahagsráðherra 2014-2016.

Fyrir í stjórninni eru:

Ragnar Auðun Árnason, tilnefndur af SHÍ

Jóhann Gunnar Þórarinsson, tilnefndur af SÍNE

Rebekka Rún Jóhannesdóttir, tilnefnd af BÍSN

Hildur Björgvinsdóttir, tilnefnd af SÍF