Um starfsmann barnaverndar: „Hann byrjaði að kenna manni að þrífa sjálfan sig“

Alls átta kærur hafa borist á hendur starfsmanni barnaverndar Reykjavíkur. Fjórar bárust áður en rannsókn hófst á málinu í janúar, þrjár eftir að rannsókn hófst og ein kæra, sú áttunda, barst rétt fyrir helgi eftir að umfjöllun um málið hófst.

Þetta staðfestir Árni Þór Sigmundsson, yfirmaður kynferðisbrotadeildar og einnig að enginn af meintum þolendum hafi verið skjólstæðingur mannsins í starfi hans heldur tengst honum fjölskyldu eða vinaböndum.

Einn þeirra er ungur maður sem lagði fram kæru í ágúst síðastliðnum en lögregla hóf ekki rannsókn á málinu fyrr en í janúar.

Maðurinn er rúmlega tvítugur í dag en var átta ára þegar meint misnotkun hófst árið 2006 en hún hætti ekki fyrr en hann var 14 ára.

„Ég fór til hans um helgar. Ég átti að læra og undirbúa mig fyrir skólann því ég átti erfitt með nám og hann bauðst til þess að vera stuðningsfulltrúi minn. Síðan gerði hann meira en hann sagðist ætla að gera.“

Hann segir manninn hafa sannfært sig að segja engum frá.

„Eftir að þú ert búinn að vinna inn traust hjá einhverjum þá er maður ekki endilega að fara segja frá strax. Ekki fyrr en maður er orðinn aðeins þroskaðari til að skilja hvað hann gerði,“ segir hann og lýsir aðferðum mannsins.

„Hann leyfði mér að spila tölvuleiki eins og ég vildi, velja í matinn, gefa mér pening. Þetta byrjaði fyrst í sturtunni þar sem hann byrjaði að kenna mér að þrífa sjálfan mig. Svo leiddist þetta út í meira. Ég var bara barn á þeim tíma og vissi ekkert hvað var í gangi í raun og veru.“

Hann segir flest brotin hafa átt sér stað á heimili mannsins sem jafnframt var stuðningsheimili fyrir börn rekið af Reykjavíkurborg. Maðurinn hætti fyrst störfum hjá barnavernd í janúar.

Hann segir fleiri börn hafa verið á heimilinu þegar maðurinn braut á honum.

„Það voru aðallega strákar. Síðasti strákurinn sem ég man eftir fannst einmitt skrýtið af hverju ég var í rúminu hans, en ekki bara frammi í sófa.“

Hann segist hafa orðið fyrir miklum vonbrigðum með kerfið þegar ekkert hafi verið gert í máli hans í marga mánuði þrátt fyrir að hann hafi tjáð lögreglu að maðurinn starfaði með börnum.

„Mér finnst það skelfilegt. Maður á ekki að taka áhættu hvað varðar svona brotamenn.“