Stytting vinnuvikunnar gæti haft jákvæð áhrif á jafnrétti kynjanna

Stytting vinnuvikunnar getur haft margvísleg jákvæð áhrif í för með sér, meðal annars á jafnrétti kynjanna að sögn lögfræðings BSRB. Þrátt fyrir að standa framarlega að vígi í jafnréttismálum er Ísland aðeins í 33. sæti af 38 löndum í samanburði OECD hvað varðar samþættingu fjölskyldu- og atvinnulífs.

Reykjavíkurborg og BSRB stóðu fyrir málþingi um niðurstöðu tilraunaverkefnis um styttingu vinnuvikunnar í Ráðhúsinu í dag. Meðal þeirra sem þar fluttu erindi var Sonja Ýr Þorbergsdóttir, lögfræðingur BSRB, en hún fjallaði um jafnréttisáhrif styttingar vinnuvikunnar.

„þetta myndi jafna ábyrgð á svokölluðum ólaunuðum störfum, það er að segja á heimilis og umönnunarstörfum, af því að við vitum útfrá rannsóknum að ábyrgð kvenna þar er þar mun meiri en karla og það hefur áhrif á þeirra möguleika til tekna og til starfsþróunar og þetta skilar sér líka út æfina því að tekjurnar þínar hafa áhrif á ellilífeyrinn og svo framvegis,” segir Sonja í samtali við Stöð 2.

Hún segir reynsluna af styttingu vinnuvikunnar í öðrum löndum verið jákvæð hvað þetta varðar, einkum í Svíþjóð og í Frakklandi, þar sem vinnuvikan hefur verið stytt. Þrátt fyrir að Ísland standi öðrum löndum framar á mörgum sviðum, á það þó ekki við í öllum tilfellum að sögn Sonju.

„Þegar maður er að skoða hvern þátt fyrir sig að þá erum við í 33. sæti af 38 Löndum í samanburði OECD varðandi samþættingu fjölskyldu- og atvinnulífs, við erum undir meðaltali, þannig að við erum ekki einu sinni nærri toppnum í þeim málum,” segir Sonja. „Hér á landi vitum við að atvinnuþátttaka kvenna er mjög há en það er um 37% kvenna sem er í hlutastarfi sem að hefur líka áhrif á tekjur þeirra.“

Tilraunaverkefnið hófst fyrst á tveimur vinnustöðum borgarinnar árið 2015 og hefur gefist vel meðal starfsmanna þjónustumiðstöðvar Árbæjar og Grafarholts sem var meðal hinna fyrstu til að taka þátt í tilraunaverkefninu.

„Ég hef bara heyrt ánægjuraddir,” segir Ester G. Halldórsdóttir, teymisstjóri í félagsrlegri heimaþjónustu þjónustumiðsöðvarinnar. Aðspurð segir hún styttinguna ekki hafa komið niður á gæðum þjónustunnar. „Nei, við þurfum að láta allt ganga, það er enginn afsláttur á verkefnunum sem við þurfum að sinna, þjónustuþegarnir þeir fá allt sitt og við þurfum að svara erindum og vinna jafn hratt og áður,” segir Ester.

Styttir vinnuvika „verði normið”

Frá og með næsta mánudegi munu um 2.200 starfsmenn, eða alls um fjórðungur allra starfsmanna borgarinnar á yfir hundrað vinnustöðum, taka þátt í öðrum áfanga verkefnisins þar sem starfsfólk mun vinna einum til þremur klukkustundum skemur á viku, en halda óbreyttum launum.

„Það er mín einlæga von að við komumst þangað sem sveitarfélag og sem samfélag að innleiðing styttingu vinnuvikunnar verði bara normið,“ segir Magnús Már Guðmundsson, formaður stýrihóps um tilraunaverkefnið. „Niðurstöður eftir fyrsta árið benda til þess að árangurinn af verkefninu sé afar jákvæður. Mælingar sýna marktækt betri líðan, aukna starfsánægju og minni veikindi. Á móti má ekki merkja að breyting sé á afköstum starfsmanna.”