Ingibjörg Pálmadóttir bætir við hlut sinn í 365 miðlum

Félagið Apogee, sem er í eigu félaga á vegum Ingibjargar Stefaníu Pálmadóttur, forstjóra 365 miðla, hefur keypt 14,5 prósenta hlut fagfjárfestasjóðsins Auðar I í A-flokki í fjölmiðlafyrirtækinu. Eftir viðskiptin eiga félög á vegum Ingibjargar samanlagt um 90,5 prósent A-hluta í 365 miðlum, sem er eigandi Fréttablaðsins.

Félagið Grandier, í eigu Sigurðar Bollasonar fjárfestis, hefur jafnframt aukið lítillega við hlut sinn í A-hluta fyrirtækisins og á nú 8,9 prósenta eignarhlut.

Þá hefur Volta, félag Kjartans Arnar Ólafssonar, selt allan eins prósents hlut sinn í A-flokki fjölmiðlafyrirtækisins og Ari Edwald, fyrrverandi forstjóri 365, minnkað hlut sinn úr 1,3 í 0,6 prósent.

Apogee á jafnframt 61 prósents hlut í B-flokki 365 miðla á móti 39 prósenta hlut fjölmiðlafyrirtækisins sjálfs.

Sjóðurinn Auður I, sem er í rekstri Kviku fjárfestingarbanka, eignaðist 14,5 prósenta hlut í 365 miðlum við sameiningu 365 og fjarskiptafélagsins Tals árið 2014. Fjölmargir einka- og fagfjárfestar lögðu sjóðnum til fjármagn en á meðal stærstu eigenda hans eru Lífeyrissjóður verslunarmanna, Sameinaði lífeyrissjóðurinn og Stapi lífeyrissjóður.

Fréttin birtist fyrst í Markaðinum, fylgiriti Fréttablaðsins um viðskipti og fjármál.