Veðurhorfur á landinu: Hver gráða skiptir máli

Búast má við strekkings sunnan átt með éljum sunnan og vestantil á landinu í dag. Það hvessir með kvöldinu og reikna má með að úrkoma verði nær samfelld í dag.

„Þar sem hitastig verður nálægt frostmarki, þá mun hver gráða til eða frá skipta miklu máli hvort úrkoman verði í formi rigningar eða slyddu eða slyddu og snjókomu,“ segir í hugleiðingum veðurfræðings á vef Veðurstofu Íslands.

Líklegt er að nær ströndinni ætti úrkoman að vera í formi rigningar en breytast í slyddu eða snjókomu eftir því sem innar í landið er farið.

Fljótlega eftir miðnætti snýst síðan í hvassa suðvestanátt, kólnar og fellur úrkoman sem snjóél.

„Útlit er fyrir að það hvessi enn frekar í éljunum og skyggni verði mjög takmarkað sem aftur gæti valdið staðbundnum truflunum í umferðinni,“ segir í hugleiðingum veðurfræðings.

Veðurhorfur á landinu

Sunnan og suðvestan 10-18 m/s og él eða skúrir, en léttskýjað NA-lands. Rigning eða slydda á S- og V-verðu landinu í kvöld, en snjókoma í uppsveitum. Hiti 0 til 5 stig.

Snýst í suðvestan 13-23 með éljum eftir miðnætti, fyrst um landið vestanvert. Heldur hægari og léttir víða til NA- og A-lands á morgun. Vægt frost víðast hvar.

Veðurhorfur á landinu næstu daga

Á sunnudag:

Gengur í suðvestan 13-20 með dimmum éljum, hvassast við SV-ströndina, en léttir til eystra. Kólnandi veður, frost víða 1 til 6 stig um kvöldið, en frostlaust syðst.

Á mánudag:

Snýst í norðanátt, víða 10-18 m/s, en lengst af mun hægari breytileg átt austantil. Éljagangur, en rofar smám saman til á S-verðu landinu. Frost 1 til 12 stig, mildast syðst.

Á þriðjudag, miðvikudag, fimmtudag og föstudag:



Norðlægar áttir og snjókoma eða él á norðanverðu landinu, en úrkomulítið syðra. Áfram kalt í veðri, en minnkandi frost undir helgi.