Eitt dýrasta hús landsins til sölu á 220 milljónir

Einbýlishús við Láland 1 í Fossvogi hefur verið sett á sölu. Ásett verð er 220 milljónir króna og hlýtur húsið því að teljast eitt það dýrasta á landinu.

Húsið er 502 fermetrar og byggt árið 1974, að því er fram kemur á fasteignavef Vísis, en var tekið í gegn og endurnýjað árið 2004. Húsið er allt hið glæsilegasta en innréttingar eru sérsmíðaðar, arinn er í stofu, skjólgarður er í kringum húsið og heitur pottur í garðinum svo fátt eitt sé nefnt.

Húsið skiptist í sjö svefnherbergi auk skrifstofuherbergis, fjögur baðherbergi og þrjár stofur. Þá fylgir kaupunum 62 fermetra aukaíbúð með sérinngangi á neðri hæð.

Myndir af húsinu má sjá hér að neðan.